Колхозым, школым вуйлатен

У ий вашеш Йывангасола тӱвыра пӧртыштӧ К.С. Кутлияровлан лӱмлымӧ касым эртарен колтышна. Кумушбай Самлиевичын илышыже тысе озанлыкын, калыкын илышыж дене чак кылдалтын - «Заря» колхозым, Йывангасола школым вуйлатен.

К.С. Кутлияров 1938 ий 5 ноябрьыште Калтаса районысо Калмиямучаш ялыште шочын-кушкын, школыш куржталын, кресаньыкын куштылго огыл пашажым аклаш тунемын. Ача-авашт икшыве-влакым изинек пашалан шӱмаҥден куштеныт, садлан рвезе нимогай паша деч лӱдын огыл, еҥ-влак дене ик ойыш шуын моштен.

1961 ийыште Башкир кугыжаныш университетым тунем лектын, химийым, биологийым, ял озанлык производствын негызшым туныктышо специальностьым налын. Шке районысо Павасола школышто завучлан ышташ тӱҥалын. 1963 ийыште Тӧлдӧ школыш директорлан колтеныт. Тыршен ыштыше самырык директорым коммунист партий радамыш пуртеныт, партийный организацийын секретарьжылан сайленыт. Тыге умбакыже илыш мундыраже шке радам дене рончалтын.

1971 ийыште КПСС Калтаса райком Кумушбай Самлиевичым «Заря» колхоз вуйлатышылан шогалташ темлен. Колхозник-влак тыгай ой дене келшеныт да председательлан сайленыт. Ты пашам тудо 1979 ий марте шуктен. Но 14 ий гыч уэш Йывангасола кундемыш пӧртылаш пӱрен улмаш. 1993 - 1998 ий Йывангасола школым вуйлатен.

К.С. Кутлияровым ял озанлыкыште тыршен пашам ыштымылан Башкир АССР Верховный Совет Президиумын да самырык тукымым куштымаште ятыр ий тыршымылан Нефтекамск оласе образований пӧлкан Чап грамотышт дене палемденыт.

Кумушбай Самлиевичын илыш-корныштыжо производственный да туныктымо паша тӱҥ верым налыт. Кызыт тудо студент годым тӱҥалме сомылым мучашлынеже. Ял озанлык специалист ден предприятий вуйлатыше-влаклан ямдылыме «Дикие одиночные пчелы-опылители люцерны синей» научно-методический пособийжын презентацийжылан ямдылалтеш.