Пашам йӧратыше еш

Школьный уремыште, чодыра воктене, мӱндырчак ару мотор пӧрт коеш. Пеленже пеҥгыде сурт-оралте, кугу сад-пакча верланеныт. Кеҥежым тушто могай гына емыж да пеледыш огыт куш! Тыгай кугу сурт-печым пашам йӧратыше еш гына ончен сеҥен кертеш. Тиде - ныл икшыван Имучаевмыт еш.

Эльза Михайловна, озавате, ялысе кум икшыван ешеш шочын-кушкын. Благовещенск педучилищым тунем лекмеке, шочмо ялышкыже пӧртылын да йочасадыште пашам ышташ тӱҥалын. Тудын вуйлатыме почеш йочасадыште да ялысе клубышто ятыр пайремым, вашлиймашым эртарыме. Ушан, тыматле, тыршыше койышан воспитательым изи йоча-влак писын йӧратен шынденыт, ача-ава-влак тудым пагаленыт.

Тиде ялыштак Эльза шке йӧратымашыжым, Алик Михайловичым, вашлийын. Самырык ешыште ныл икшыве шочын. Кугу ӱдырышт, Регина, кооперативный колледж деч вара БГУ-н Бирск филиалыштыже тунемеш. Ешан, пелашыж дене эргым куштат. Екатерина Уральский кугыжаныш горный университетыште, Аделина БГПУ пеленсе колледжыште шинчымашым погат. Изи эргышт, Саша, нылымше классыште тунемеш. Тудо отличник, спортсмен да уста куштызо улеш. Икшыве-влак ава-ачам эре куандарен шогат да нунылан чыла пашаште эҥертыш улыт.

Пытартыш ийлаште Эльза Михайловна школышто тӱҥалтыш класс-влакым туныкта. Тудын пашажым школ директор О. Янибекова кӱкшын акла. «Эльза Михайловна у верыштат шкенжым тыршышан да уста туныктышо семын ончыктыш, сандене коллективыште тудым пагалат да тудын дене кугешнат», - ойла Ольга Сергеевна.

Кызыт Э. Имучаева икымше квалификаций категори-ян туныктышо улеш. Тунем-шыже-влак школышто да районышто эртарыме тӱрлӧ конкурс ден таҥасымашлаш-те чӱчкыдын ончыл верыш лектыт. Ӱдырамашын тыршымыжым аклен, образований район пӧлка тений тудым Чап грамот дене палемдыш.

Эльза Михайловна - сай ава, поро кова, пагалыме туныктышо, уста озавате да ура чонан айдеме. Тудын илыш эҥертышыже - йӧратыме Алик Михайлович пелашыже. Тиде пеҥгыде ешлан тыныслыкым, икте-весым умылымашым, пиалым да ыҥгайлыкым тыланыме шуэш.