Коян селасе марий рвезе

«Арланнефть» НГДУ-н ППД цехыштыже дежурный операторлан ыштыше Ю.С. Салиев - тачысе унана. Шукерте огыл тудо йыргешке лӱмгечыжым пайремлыш. Чын, тÿжвач ончымаште Юранат ош кава йымалне шке вержым кычал мумо кышаже моло деч кугунжак ок ойыртемалт. Школ дене чеверласымек, Сарапулысо механический техникумышто кÿлеш профессийым налын. Мÿндыр Эрвелне салтак тургымым эртен. Нефтекамскысе «Искож» фабрикыште пашам ыштен. Манмыла, чыла шке радамже дене. Но пиал дене пырля еш илыш поснак сурт озалан тÿрлö пÿсö йодышымат туран шынден - вуй ÿмбалне «леведыш», окса да эше тесте наре кырча-марча… Адакшым уремыште - «кÿдырчан» 90-ше ийла. Чыла тидыже мемнан геройнамат Йÿдвелыш тарватен.

«Лукойл» озанлыкыште 26 ий машинистлан ыштыше Г. Миронов ойла: «Юрий Салиянович, кеч-могай пашалан пижеш гынат, мучаш марте умылен налде, тÿҥге- вожге шерын лекде, мо шуктышашым ворандарыде ок лыплане. Йÿдвелнат тыге лийын, «шем шöртньым» лукмо пытартыш верыштыжат - тыгак. Икманаш, чытамсыр койыш-шоктышан, руш манметла, «молодец!» Ойжо дене пÿтынек келшем. Тыгодым шке гычат ешарынем. Юрий тос вашлийме еда кеч-кунамат шыргыжал саламлалтеш, уло шÿм-чон порылыкшо воштончышла тÿжвак волгалтеш. Садланак дыр тÿрыс ийготшо деч палынак самырыкын коеш. Таклан огыл серымемын тÿҥалтыштыже «тиде рвезе» маньым. А теве иктаж-могай кÿлешан йодышым рашемдышыла, чумыр сын-кунжо «профессорыным» налеш, юзо семын шинчалан перныдыме «шарик-винтикшымат» лончылен опта.

Варарак эше ик оҥай рашеме: Юрийын салтак корныжо ВВ-ште (внутренний войскаште) Дальний Востокышто эртен. Младший сержант званий дене мöҥгö пöртылын. А тыгай службыш, манметла, айда-йӧра еҥжымак огыт нал, тÿрлö велымат савыркален-текшырен ончат. Мыйын шонымаште, теве кушто уло секрет-рÿдыжö!

Юрий Салияновичын эше ик суапле могыржо - эре полшаш ямде улмыжо. Пöртым чоҥымо годым шуко гана «ача» семын ой-каҥашым пуэн шоген. Поснак палемдыме шуэш, Юрий Салиянович техникымат сай пала.

Ынде ешыж денат палдараш жап дыр, шонем. Пелашыже, Ольга Михайловна, У Пураял школышто руш йылмым да сылнымутым 27 ий вÿда. Кугу опытан туныктышо. Кок эргым ончен куштеныт. Кугуракышт, Александр, армий деч вара ачажын ыштыме цехыштак тырша, а Владимир кызыт салтак радамыште - Челябинск кундемыште. Можо путырак куандара: ты ешыште икшыве-влак дене изинек марла гына лывыргын кутыралтен колтат. Йоча-влак, кугеммекат, шке шочмо йылмышт дене порын пелештат.

Юрий Салиянович ден пелашыже кок пачашан суртым нӧлтен шынденыт. Пӧртыштат, сурт-оралтыштат чылажат шот дене: монча, гараж, сад-пакча. Яра жапыште пырля колым эҥыраш йӧратат. Йолташемын мутшо гыч, южгунамже пелашыже Юра деч шукыракат куча. Шыжым чодыраште поҥгым погат. Нимогай шокшо велышкат каяш ок кӱл. Тиде ешлан мый тазалыкым, уш-акылым, ваш-ваш вычыматен, келшен илаш тыланем! Очыкыжымат илыш сапетым пеҥгыдын кучо, Юра йолташ!