Ӱткӱстӧ ялын фельдшерже

Тудо ял калыкым тӱрлӧ чер деч арала, эмла. Эмлыше еҥ-влак кеч-кунамат кӱлыт. Кызытсе жапыште нунын деч посна иленат огына керт. Ялыште медик уло гын, лӱдман огыл: ме палена, тудо кертмыж семын полша. Кӱлеш гын, эмлымверышкат намиен кода. Нуно мыланна Кугу Юмо гай улыт. А ме таза улмына годым нунылан таум каласашат мондена.

Еш архив гыч налме фото.

Мый шкенан фельдшерна нерген каласкалынем. Людмила Ивановна Шамсутдинова ятыр жап Ӱткӱстӧ ялысе ФАП-ыште пашам ышта. Тудо Иткули селаште ила, кажне кечын паша верышкыже вашка. Пеш шуко черлылан полшен ила. Кажне шочшо йочалан кокымшо ава улеш. Самырык ава-влаклан - сай йолташ. Нунын да нелын черланыше-влак деке кечын коштеш. Кеч-могай игече лийже, тудо черлылан полшаш вашка. Кӱлеш гын, «Вашкеполышым» ӱжеш, черлым Караидель селасе больницыш ужата. Шукыж годым черле еҥ, ласка шомакшым колын, эмжым умшаш налын, писын тӧрлана. Черле еҥлан шуко кӱлеш мо? А кӱлеш тудым чаманыше, колышт моштышо. Пенсионер-влаклан Караидель гыч эмымат конда.

Людмила Ивановна йочасадыш да школыш миен коштеш. Йоча-влак тудым куанен вашлийыт. Прививка да укол дечат огыт лӱд. Нунын дене фельдшерна ласкан мутлана, тазалыкым аралаш туныкта. Школыштына пытартыш кум ий грипп дене черланыше йоча шагал лие, карантинат лиймаш уке. Фельдшернам ялыште чылан пагалат. Людмилан пелашыже, Геннадий Шамиданович Шамсутдинов, - тудын эн кугу полышкалышыже. Ала-молан еҥ-влак йӱдым да эрдене черланат. Кенета черланыше еҥым але азам шочыктышаш ӱдырамашым эмлымверыш намиен кода. Тыгайже тӱрлӧ жапыштат лийын кая, но Геннадий Шамиданович ок ӱчаше - ватыжын мутшым колыштеш. Ӱткӱстӧ ялыште илыше-влак «Вашкеполышым» виктарышылан кугу таум ойлат, тазалыкым тыланат.

Шамсутдиновмыт келшен илат, суртысо пашамат пырля ыштат. Нуно кум икшывым ончен куштеныт. Кок йочашт пелне тунемыт. Каникул годым ава ден ачалан полышкалат, вет ялыште илышын пашажат ситышын.

Людмила Ивановна Шамсутдинова, пашат ушнен шогыжо. Ял калык таза лийже, йӱдым ласкан малаш эрыкым пуыжо. Рвезе калык ялыште пашам мужо, шуко икшыван лийышт. Ял калык лӱм дене мый тыланда вуем савем, тазалыкым, пашаштыда сеҥымашым, ешыштыда умылымашым да пиалым тыланем.