Автобус ялыш вашка

Караидель районысо Ӱткӱстӧ ялыш автобус кошташ тӱҥале. Калык тудым куанен вашлие. Ончыч тошто автобусым пуэныт ыле, садлан шоферлан паша ешаралт шоген, эре ачалыман, салоныштыжо йӱштӧ. Вара уым пуышт. Автобусым Александр Изиланов кондыштара. Ончыч «Мировой Октябрь» колхозышто шоферлан пашам ыштен, вара Караидель АТП-ш куснен.

Ял калык Караидельыш мият, тургыжланыде, чыла сомылжым шукташ тырша. Поро чонан шоферна чылаштым шарна, изиш вучалта, корныштат иктымат коден ок кай. Тудо еҥ-влак деч шуко ласка мутым колеш.

Александр салонжым арун куча, тушто шокшо, южшо яндар. Автобусышкыжо калык эре шуко погына. Ӱткӱстӧ ял гыч марий, Артакул села гыч руш, Байкибаш села гыч татар ден пошкырт-влакым поген наҥгая. Нунышт икте-весышт дене ик шочшо семын веселан кутырен каят. Шоферна чылашт денат лыжган мутлана, кажныжлан поро мутым муэш. Индеш ий жапыште тудын шотышто АТП-шке ик вуйшиймашат пурен огыл. Александр Ильич шке пашажым йӧрата, шуктен ышта. Пашаштыже шофернам пагалат, тудын тӱрлӧ наградыже-влак улыт.

Ӱткӱстӧ ялыште Александр Ильичын пӧртшӧ мӱндырчын волгалт шинча, кудывечыжат ару. Кеҥежым чыла вере пеледыш пеледеш. Маргарита Дмитриевна дене келшен илат. Ватыже марийжым паша гыч шокшо кочыш ден вашлиеш. Нуно йочашт ден уныкаштымат йӧратен ончат. Нуным кугу еҥым пагалаш, мутыштым колышташ туныктат. Шофер паша пеш кӱлешан да неле. Еҥ коклаште шкем кучен моштыман, нуным таза-эсен мӧҥгышт намиен шуктыман. Александр, ял калык лӱм дене тыланда тазалыкым, пашаштыда уҥымашым, ешыштыда умылымашым да пиалым тыланем. Корнан лийза!