Поро, пашаче ӱдырамаш, уста озавате

1958 ий шыжым Наталья Федоровна ден Михаил Петрович Петровмытын ешыште нылымше икшыве, ӱдыр, шочын. Ачаже тудлан Раисса лӱмым пуэн. Ешыште ӱдыр пытартыш икшыве лийын гынат, акаже-влак деч вараш кодаш тыршен огыл. Йоча-влак изинек кугуракым пагалыше, пашам йӧратыше лийын кушкыныт.

1966-1970 ийлаште Раисса Кокасола тӱҥалтыш, 1970-1974 ийлаште Йывангасола кыдалаш школлаште шинчымашым поген. Ушан, тыматле, тыршыше койышан улмыж дене тудо моло деч ойыртемалтын. Кармансола кыдалаш школышто тунеммыж годым тракторым виктараш правам пуышо документымат налын.

Латик классым тунем лекмек, пагалыме авана-кована Йывангасолаште почтальонлан ышташ тӱҥалын. Кок тылзе гыч тудым почто вуйлатышылан шогалтеныт.

1976 ийыште Раисса Михайловна Пермысола рвезылан марлан лектын. Икте почеш весе кум икшыве шочыныт. Пашалан тунемше ӱдырын йоча дене шинчыме жапыштат яра жапше лийын огыл - кеҥежым комбайныште пелашыжын полышкалышыжлан тыршен.

Раисса Михайловна 35 ий Йывангасола почтым вуйлатен. Пашажым йӧратен, шуктен ыштымыжлан Чап грамота, «Ударник коммунистического труда», «Победитель социалистического соревнования», «Ветеран почтовой связи» знак-влак дене палемдалтын. 2009 ийыште «Мастер почтовой связи Республики Башкортостан» лӱмым пуымо.

Раисса Михайловна мер паша дечат ӧрдыжеш кодын огыл. Ятыр ий Пермысола ялыште депутат пашам шуктен. Поро кумылан улмыжлан, еҥым умылен моштымыжлан ял калык тудым пагала.

2013 ий гыч шергакан авана-кована сулен налме канышыште улеш. Пашам йӧратыше ӱдырамаш эре мом-гынат ыштылеш. Кеҥежым пакчаштыже могай гына емыж ок куш! А пеледышыже! Кушко от ончал, чыла вере мотор деч мотор пеледыш кушкеш. Тудо уста суртоза веле огыл, тыгак уста колызо. Эрдене, кунам чылан эше тамле омо дене малат, тудо, кок-кум эҥырым вачыш пыштен, кидеш ведрам кучен, колым эҥыраш ошкылеш. Еҥ кынелме жаплан, пел ведра олаҥгым, каракам кучен, мӧҥгӧ пӧртылеш...

Раисса Михайловнам индеш уныкаже куандара. А икшывыже-влак чылан ешышт дене илат.

Ноябрь мучаште пагалыме авана, кована 60 ияш лӱмгечыжым палемдыш. Тудлан пеҥгыде тазалыкым, кужу-кужу ӱмырым тыланена. Тек илышыже пиалан да волгыдо лиеш.