Авам дене кугешнем!

Витле вич ожно октябрь тылзе мучаште Ольга Николаевна ден Павел Шамратович Шамратовмытын кумшо икшывышт шочын, тудлан Надежда лÿмым пуэныт. Ий - влак эртеныт. Ача ден ава икшыве-влакым поро ден осалым ойырен мошташ, пашам йöраташ, эллан пайдале айдеме лияш туныктеныт. Икшыве-влак ача-ава сугыньым шуктеныт.

Авам школышто тунеммыж годымак туныктышо лияш шонен. 1979 ий шыже тылзын Благовещенск пед-училищыш тунемаш пурен. Тунемме жапшым авам поро мут дене шарна. Тушто мондалтдыме шуко йолташ да сай туныктышо-влак дене вашлийын. Кызытат авам тунемме йолташыже-влак дене кылым куча, а туныктышышт-влак дене нуно эреак вашлийыт. Тунемме жапыштыже авам спорт денат кылым кучен, педучилищын чапшым арален, волейбол дене сборный командын капитанже лийын. Тудлан тӱрлӧ олалаште - Тамбовышто, Липецкыште, Курскышто - модаш пиал логалын. Командышт эре сеҥыше радамыште лийын.

1983 ийыште авам пед-училищым сайын тунем лектын да направлений почеш Мишкан районыш логалын. Паша корныжым Токтар школышто тӱҥалын. Тиде жапыштак авам, паша деч кӱрылтде, Бирск пединститутышто руш йылме факультетыш тунемаш пурен.

1985 ийыште йӧратыме Олег ачамын йӧратыме пелашыже лийын. Ешыште кум икшыве шочын. Эн кугужо - мый, Олеся, авамын корныжым тошкем, изак-шоляк Беловмыт лӱмеш Тынбай кыдалаш школышто тӱҥалтыш класслаште туныктем. Шӱжарем - Катя. Тудо Уфасе юридический институтым тунем лекмыж деч вара Россий МВД-н Мишкан районысо пӧлкаштыже вуеш шудымо икшыве-влакын пашашт шотышто кугурак инспекторлан пашам ышта. Ме шкежат ынде ешан улына. Дима шольына шукерте огыл, Россий армий радамыште служитлен, мӧҥгӧ пӧртыльӧ. Тудо Уфасе политехнический техникумын Бирск оласе филиалыштыже 4 курсышто тунемеш. Аванан ӱшанле эҥертышыже улеш.

Умбакыже авамын туныктымо корныжо У Тынбай тӱҥалтыш класслаште эртен. Тушто кум ий пашам ыштымеке, шочмо Тынбай школышкыжо пӧртылын. Тачысе кече мартеат тиде школыштак пашажым ӱшанлын шукта. Авам йоча-влакым шинчымаш курыкыш моштен кӱзыкта, шочмо марий калыкын культурыжым, историйжым йӧраташ туныкта. Тудын тунемшыже-влак кажне ийын районысо, республикысе, межрегиональный олимпиаде ден конкурслаште сеҥышыш лектыт. Тунемшыже-влак авамым поро мут дене шарнат. Кызытат кылым кучат - телефон дене йыҥгыртат, унала толын коштыт.

Тыршымын пашаже кӱкшын аклалтеш. 2003 ийыште «Россий Федераций образованийын почётан пашаеҥже» лӱмым сулен налын, шуко гана БР да Марий Эл Образований министерство-влакын Чап кагазышт дене палемдалтын. «Российын эн сай еҥже-влак» энциклопедийыште авамын фамилийжат уло, 2006 ийыште «Образований» национальный проект дене грантым налын. 2014 ийыште Йошкар-Олаште «Марий йылме туныктышо» межрегиональный конкурсышто призер радамыш логалын. 2017 ийыште Туныктышын кечыже вашеш авамым Уфа олаш БР Правительствыш вашлиймашке ӱжыныт да «Башкортостан Республикын сулло туныктышыжо» лӱмым пуэныт. Чыла сеҥымашыжлан куанен, уло чонна дене йӧратен, ме авана дене эреак кугешнена.

Кажне еҥ илышыштыже тÿрлö нелылыкым вашлиеш. Тиде жапым илен лекташ лишыл еҥ кÿлеш. Ала-кӧн лишыл еҥже - ватыже, весын - ачаже але йолташыже, а мемнан эн лишыл еҥна - авана. Ава веле тыйым умылен кертеш, полыш кидым шуялташ кеч-кунамат ямде улеш. Мыланна авана - тÿняште эн шерге еҥ. Кеч тидым мут дене каласен мошташат ок лий. Ме аванам моткоч йöратена. Тудын лÿмжӧ - Надежда, лÿмжак мыланна вийым пуа, а шинчаончалтышыже да поро кумылжо илыш-корнышто пеҥгыдын шогаш полшат. Тудо мыланна чыла шотыштат пример улеш. Мыйын шонымаште, кажне еҥ шке аважым пагалышаш, вет тудо тыланда илышым пӧлеклен. Садланак осал мутым нигунам ида каласе. Кажне осал ой аван ÿмыржым ик ийлан кÿчыкемда.

29 октябрьыште авам юбилейжым палемдыш. Ме тудлан поро деч поро мутым ойлена. Таза лий, умбакыжат марий шӱлышым вияҥдаш, калыкнан лӱмжым нӧлташ виет шутен шогыжо. Тек илышет пиал дене темеш, а ласка да поро кумылет калык коклаште шарла.

О. ИБАТОВА.