Илыме верым моторрак ыштынешт

Мыйын ава-ачам, Янсуло Васильевна да Виталий Ильич Осиевмыт, Мишкан села воктенсе Памаш ялеш шочын-кушкыныт. Но илышыштын кугурак ужашыже Нефтекамск ола дене кылдалтын. Ятыр ий коктынат Нефтекамск автозаводышто пашам ыштеныт: ачам - 14 ий КИПиА слесарьлан, авам - 27 ий мастерлан. Тыршымаш дене коктынат пагалымашым суленыт.

Ачам ден авам 43 ий икте-весым пагален, умылен илат. Оласе частный секторышто шке суртым чоҥен шогалтеныт, ятыр пушеҥгым шынденыт. Кок икшывым ончен куштеныт. Ынде уныка-влакат юарлен куандарат.

Ачам ден авам, сулен налме канышыште улыт гынат, яра огыт шинчылт: эре мом-гынат шонен луктыт, мом-гынат чоным пыштен ыштылыт. Нунын тыршымышт дене сурт ончылнына икшыве-влаклан йоҥгыдо модмо вер «кушкын шогалын». Автомашинан тошто ораваже-влакым пӱчкеден, ачам йомакысе, мультфильмысе персонаж-влакым ушештарыше 30 модышым ыштен. Конешне, пеленже авамат шогылтын, полышкален, ой-каҥашым пуэден. Ынде тышке пошкудо суртласе гына огыл, вес уремласе икшыве-влакат модаш куржталыт. Ачам тидлан нимучашдымын куана, вет тыршымыже арам лийын огыл.

Ачам ден авамлан ончыкыжат таза лияш да ваш-ваш эҥертен, икте-весылан полшен илаш тыланем.