Яллаште Илалше-влакын кечыштым пайремленыт

Акпарс ял поселенийыште пайремым эртараш калык Акпарс, Мешер, Усола школлаш, Шалтык клубыш погыныш. Чыла ялыштат уна-влакым шокшын вашлийыныт. Верысе предприниматель-влак чесым погаш полшеныт. Шокшо кочышым кӱктен, самовар дене чайым шынден, шоҥгыеҥ-влакым ӱстелтӧрыш пагален ӱжыныт.

Школлаште кажне толшылан мотор пеледыш аршашым да шке ыштыме открыткым ямдыленыт. Тунемше-влак почеламутым лудыныт, коча-ковалан мурым, куштымашым пӧлекленыт, мыскарам модын ончыктеныт. Пенсионер-влакынат муралташ-кушталташ кумылышт тарванен.

Акпарс ден Усола калыкым ял поселенийым вуйлатыше Р.Г. Ягудин саламлыш, илалше-влаклан пеҥгыде тазалыкым, ласка илышым, поро кумылым да еш пиалым тыланыш. Акпарс ялын ӱдыржӧ, районышто палыме предприниматель, чолга марий ӱдырамаш Н.М. Давлетова пайремыш яра кид дене толын огыл: кажне пенсионерлан шокшо киндым, чак-чакым да кугурак ийготан 15 еҥлан «Чолман» газетлан подписной квитанцийым кучыктыш.

Усолаште тиде кечын Гульян Мухаметгалеевна ден Александр Акбатырович Асмаевмытым шӧртньӧ сӱанышт дене саламлышт. Нунылан Республика Вуйлык Р.З. Хамитов деч пӧлекым да тауштыме серышым кучыкташ районысо «Марий вий» организацийым вуйлатыше А.Б. Минлин толын ыле. «Ош пеледыш» ансамбль юбиляр-влак лӱмеш сылне муро-влакым йоҥгалтарыш.

Тиде пайремым ямдылымаште Л.М. Шамыкаева, Е.Д. Курмакаева, Л.М. Миннулина, Т.Г. Петрова чот тыршеныт. Ончыкыжымат пырля келшен пашам ышталтеш манын ӱшаныме шуэш.

Шаран район.

Павасола ял клубышто эртыше каныш касыш паша ветеран-влакат ятырын погыненыт ыле. Тудым верысе Ветеран ушемым вуйлатыше Н.И. Ахмадиева почо, погынышо-влакым порын саламлыш. Калмиямучаш Ветеран ушемым вуйлатыше Г.А. Ибакаев республикысе полыш-влак нерген каласкалыш. Илалше-влаклан пеҥгыде тазалыкым, сай илышым тыланыш.

Пайрем касым изи ӱдыр-эрге-влак сӧрастарышт: лыжган кушталтышт, Максим Гареев да Антон Биктимиров весела мурым пӧлеклышт. Концертым клуб вуйлатыше Снежана Гареева да тудын полышкалышыже Инна Ахмадиева шуйышт. Кумылло марий сем чылалан келшыш. Кидым рӱж пералтен, таум ыштышна.

Ӱдыр-влак пайрем сийым: мелнам, тувыртыш когыльым, тӱрлӧ салатым - ямдыленыт ыле. Григорий Александрович баяным шоктыш, муро конкурсышто сеҥаш тыршенак мурышна. Илышыште лийше историй-влакым шарналтен шинчышна: кузе 1957 ийыште, ялышке генераторым конден, электротулым пуэныт, радиоузелым шынденыт… Ме чылан могай-гынат пашам ыштенна: икте колхозышто тыршен, весе школышто йочам туныктен, кумшо сӧснам ончен, ушкалым лӱштен, тракторым, комбайным виктарен, шурным куштен, южышт вуйлатыме пашам шуктеныт.

Мучашлан, Кугу Ачамланде сарыште лийше-влакым шарналтен, монумент воктек ошкылна. Пеледыш аршашым пыштен, вуйнам савышна.