Уло тугай кече

Шыже тылзыште уло тугай кече, кунам уло кумылын шоҥгыеҥ-влакым саламлыме шуэш. Мемнан районышто илалше-влак лӱмеш тылзе мучко тӱрлӧ мероприятий лие: кол кучымаш, теннис дене модмо турнир, тошто муро пайрем да молат. У Пураял клубат ӧрдыжеш ыш код. 1 октябрь вашеш тунемше-влак дене открыткым ыштышна, коштын кертдыме шоҥго-влакым мӧҥгыштышт саламлышна, молыжлан ӱжмашым шалатышна. Кок арня ончыч «Шоҥгылык ончылно вуйнам савена» сӱрет да «Еш альбом» фотоконкурсым увертаренна ыле. Тушко йоча да кугурак-влак ушнышт, клуб фойеште сӱрет да фотографий-влак гыч стендым сӧрастарен шындышна. Тошто Пураялыште илыше Геннадий Шангареев (снимкыште) шке тодмо корзиҥгаже-влакым кондыш. Пакчасаскам ешарышнат, фойена ятырлан мотореште.

Илалше-влакын кечыштым Пураял администраций вуйлатыше Р.А. Сайфутдиаров почо, вара Ветеран-влак ушемым вуйлатыше О.К. Байдугановлан мутым пуышна. Веселарак лийже манын, тӱрлӧ викториным, туштым ямдыленна ыле. Коянысе уна-влак, вате-марий Гайнуллинмыт гармонь почеш такмаклышт, А. Сапаев гармонь дене шоктен мурен пуыш, «Локама» ансамбль икмыняр мурым йоҥгалтарыш, «Зов предков» регион-влак кокласе конкурсышто Гран-прим налше Демьян Шамиев да дипломант Ильнара Шайгатарова почеламутым сылнын каласкалышт. Эн тутло кулинар сийым ямдылыме конкурсыш ушнышо-влаклан чылаштлан пӧлекым кучыктышнат, чылан сийышт дене шокшо чайым подылна. Вара тывырдыкым куштышна, вальсым пӧрдна. Иктат мӧҥгыжӧ каяш вашкен огыл - кунам эше тыге пырля погынет! А 5 октябрьыште пенсионер туныктышо-влакым унала ӱжна. Нунын дене ожсо школ илышым шарналтышна, кызытсе пагыт нерген кутырышна, чайым йӱктен ужатышна. Вашлиймашна чылалан келшыш.

Мероприятий-влакым библиотекарь М.Ф. Семенова дене пырля эртарышна. Мыланна индивидуальный предприниматель Э. Кусаметова да «Локама» ансамбль полшышт, нунылан кугу тау!