Ешыштат, пашаштат йоча-влакым йӧратен куштат

Нефтекамск оласе йочасад-влакын конкурсыштышт «Образцовая группа раннего возраста» номинацийыште тений 44-ше йочасадын группыжо сеҥышыш лектын. Кеч-могай сеҥымашат иканаште ок тол, тудо айдемын кажне кечын тыршен ыштыме пашаж деч шога. Тиде группысо икшыве-влак сай воспитатель-влакын - Марина Петровна Чигвинцева ден Надежда Олеговна Ахмадиеван - кидышкышт логалыныт. Нуно, йоча-влаклан оҥай лийже манын, дидактический модышым эртарат, уым пален налаш тӱрлӧ пособийым шке кид дене ыштат, театральный постановкым ямдылат, сценыште йомакым модын ончыкташ туныктат. Марина Петровна кидпашалан мастар, мотор пеледыш-влакым кушта. Тӱҥ пашашт деч посна йочасадысе кугурак ийготан группысо йоча-влак денат заниматлат: М.П. Чигвинцева «Весела математика» кружокым вӱда, Н.О. Ахмадиева шахмат дене модаш туныкта. Надежда Олеговна мер пашаштат шкенжым чолган ончыкта. Тудым йочасадын командыж дене пырля образований пашаеҥ-влакын КВН-штышт ужаш лиеш, тений «Аленушка» куштышо ансамбльышт оласе предприятий да образований учреждений-влак кокласе художественный самодеятельность конкурсышто йочасадыштлан ончыл верлаш лекташ полшыш. А эше «Шӱдыргорно» марий ансамбльыш кумылын мураш коштеш, марий тӱвырам, марий шӱлышым шарымашке надырым пышта. Кушеч чылалан жапым муэш тиде самырык марий ӱдырамаш? Вет шкенжынат ешыже уло, Алексей пелашыж дене кок икшывым ончен куштат. Йодаш тоштыда гын, тыгайрак вашмутым колын кертыда, очыни: «Жапым муаш лиеш. Кеч-могай лектыш ешыште икте-весылан эҥертен, полшен илымаш гыч тӱҥалеш. Сеҥымашат тыгак тапталтеш. Кӧ тырша - тудо йӧным кычалеш, а кӧн ыштымыже ок шу - тудо амалым муаш тырша». Такше тидым чылан палат, нимом ешарышаш уке.