Ила коклаштына чолга ӱдырамаш

Вашлиймашке шочшыжо, йолташыже, туныктышо-влак, ял калык погыненыт ыле. Лирика сем почеш пайремын вӱдышыжӧ-влак 1974-ше ий август тылзым шарналташ ӱжыч… Лач тудо ийлаште Алевтина Михайловна паша корныжым тӱҥалын. Вуйлатыше лиймешкыже, тудо «производствын чыла тошкалтышыжым» эртен: ялсоветын тӱҥ бухгалтерже, столовый вуйлатыше, машинотракторный мастерскойышто нормировщик, йочасад вуйлатышыланат ыштен.

Касыште Алевтина Михайловна лӱмеш Йывангасола ялсовет вуйлатыше К.К. Зай-накаева, Г.И. Уварова, моло уна-влак шуко поро мутым ойлышт. Галина Ивановнан школыш туныкташ толмыж годым Алевтина Михайловна 5-ше классыште тунемын. Изирак, но пеҥгыде кап-кылан, толкыналтше ӱпан ушан ӱдыр вигак шинчажлан пернен.

1986 ий 6 ноябрьыште Алевтина Михайловнам Йывангасола ялсовет исполком вуйлатышылан сайлымеке, тудо ӱшаныме сомылжым 2010 ий марте шуктен.

А.М. Кугубаева пашаште веле огыл, ешыштат пеҥгыдын йодын мошта. Тудым кум икшывыже куандара - Эдик, Сергей да Виколина. Чылаштланат кӱшыл образованийым налаш полшен. Сулен налме канышыште улеш гынат, чулым ӱдырамаш жапым арам ок эртаре - икшыве-влаклан эҥертыш улеш, Миша уныкажым кушташ полша. Чолга ӱдырамаш Йывангасола ялсоветын Кокасола округыштыжо депутат сомылым шукта.

Пайрем кас озан илыш-корныжо, ешыже, пашаже, канышыже дене кылдалтше да шуко сериян кино семын чоҥымо презентацийым ончышна. Нине слайдым лаштыклыме годым Алевтина Михайловна кажне фото нерген пуйто таче лийме гаяк каласкалыш.

Ме коклаштына тыгай чолга ӱдырамаш илыме дене кугешнена. Жап куржеш гынат, тыгай айдемын пашажым нимо дене висен да аклен мошташ ок лий.

Л. АЛЫНБЕКОВА, Йывангасола тӱвыра пӧртын вуйлатышыже.