Икымше туныктышем

Тыгай кече кажне еҥынат уло. Икымше класс, икымше йыҥгыр, икымше туныктышо… Йочан кузе тунемаш тӱҥалмыже, илыш корныжо, мыйын шонымаште, икымше туныктышо деч шога. Мыйын икымше туныктышем - Мария Алексеевна Гареева. Мый тудым тунемаш пурымо кече гычак йӧратен шынденам да кызытат пеш пагалем. Школым тунем пытарымылан 37 ий эртен гынат, кокымшо авам гай улеш. Паша стажше - нылле ий наре. Тиде жапыште эргым ден ӱдыремымат туныктен, мариемын икымше туныктышыжат тудак улеш.

Мария Алексеевна мыйым изинек мураш кумылаҥден. Шарнем, школысо концерт-влак годым эре шкетемым мурыкта ыле, садланак изинек сценыште мураш лӱдын омыл, шонем. Мыйым кызытат порылан, сай пашалан гына туныктен шога. «Тыйым вурсышо лиеш гынат, иктыланат тореш ит пелеште, кораҥ гына кай», - манеш. Иктаж-могай умылыдымо йодыш лектеш гын, Мария Алексеевна дене каҥашем. Темлыме ойжо эре ыҥгайле лиеш.

Мария Алексеевна 1948 ийысе поян август тылзыште Мишкан селаш шочын. Йоча жапше Курык гоч Памаш ялыште эртен. Мишкан кыдалаш школ деч вара Йылыш да Арзамат школлаште вожатыйлан ыштен. 1968 ийыште Нерге школышто тӱҥалтыш класс-влакым туныкташ тӱҥалын. Паша деч кӱрылтде, Йошкар-Олаште пединститутым тунем лектын.

Еш пиалымат Нергыштак чоҥен - Сайпан Сайнушевичлан марлан лектын. Гареевмытын Игорь да Валерий эргышт шочыныт. Мария Алексеевна ден Сайпан Сайнушевич пеш татун иленыт, кок икшывыштланат кӱшыл шинчымашым пуэныт. Сайпан чӱчӱм колхозышто да районышто ончыл комбайнёр семын палат ыле. А Мария Алексеевна кажне тунемшыжлан йӧратыме туныктышо лийын, у шинчымашым шыҥдарен умыландарен, пашам йӧраташ, поро кумылан лияш туныктен. Шкежат йоча-влакым пагален да йӧратен. Пашам тыршен ыштымыжлан Чап грамот-влак дене палемденыт, 1994 ийыште «Башкортостан Республикысе образованийын отличникше» чап лӱмым сулен.

Мария Алексеевнам шке икшывыже, уныкаже-влакат куандарен шогат. Игорь эргыже - историй наука кандидат, БашГУ-н Пӱрӧ филиалыштыже преподавательлан тырша, Валерий эргыже Йӱдвелыш пашаш коштеш. Марианна да Лиана шешкыже-влак туныктышылан ыштат.

Мария Алексеевна, сулен налме канышыште улеш гынат, яра ок шинче, сурт сомыллан полышкала, уныка-влакым онча, тӱрым тӱрла, урга, пидеш. «Ӱжара» мурышо калык ансамбльын ветеранже да ик тале мурызыжо улеш. Икмыняр ий годсек Нерге ялысе Ветеран советым вуйлата. Кажне пенсионерым жапла, илышыжым пален шога. Ялысе пенсионер-влакым командыш чумырен, районышто эртарыме мероприятийлашке кондыштара, шуко гана призовой верымат конденыт. Кодший «Нерге вел такмак-влак» сборникым чумырен да савыктен луктын. «Чолман» газетым лудшо-влак Мария Алексеевнам статьяже-влак гыч палат. Возымыжым ятыр номерыште куанен лудынна.

Теве тыгай мыйын икымше туныктышем! Йӧратыме туныктышем август кыдалне йыргешке лӱмгечыжым палемдыш. «Чолман» газет гоч Мария Алексеевнам чыла тунемшыже лӱм дене шокшын саламлем. Мыйым изинек тунемаш кумылаҥдымыланда, мураш-кушташ, кидпашам ышташ, сценышке лӱдде-вожылде лекташ туныктымыланда, Мария Алексеевна, пеш кугу тау! Таза лийза! Юбилейда да У тунемме ий дене!

С. КАНШАЕВА.