Уста марий пашаеҥ

Уфа оласе Домостроительный комбинат КПД-ште Н.Я. Янситов 1986 ий 22 апрельыште пашам ышташ тӱҥалын. Ик идалык мастерлан, варажым 2000 ий марте механиклан тыршен. Тудын кидыш мланде ӱмбалсе да йымалсе галерейын ленточный транспортержо-влакым, цемент ден инертный материал склад-влакым, химреагент участкым пуэныт. Николай Ямлыкиевич икымше кече гычак ӱшанен пуымо чыла оборудованийым шымлаш тӱҥалын: кузе нуным олмыкташ, обслуживатлаш тӱрлӧ техпаспорт ден инструкцийым лудын да лончыл лектын. Шинчымашым келгемдаш манын, посна технический литератур денат палыме лияш логалын. Цемент оборудованийлан тунемаш гына кум ий кӱлын: тушто кугу атмосферан тӱрлӧ насос да пневмоцилиндр-влак дене пайдаланеныт.

Пашаште да коллективыште шкенжым чолга, уста пашаеҥ семын ончыктен. Кодшо курымын 90-ше ийлаштыже комбинат кум смена дене пашам ыштен. Кызытсе жап дене таҥастараш гын, пеш кугу ойыртемым ужаш лиеш: тунам суткалан 12 вагон цементым конденыт, ынде - тылзылан 75 вагоным веле. Паша пеш шуко лийын. Южгодым Николай Ямлыкиевичлан оборудованийым олмыкташ йӱдымат кынел каяш логалын. 1989 ийыште тудын полшымыж дене цемент складыште кӱртньӧ-чойн корно висам вераҥденыт.

2001 ий гыч уста землякнам участкым вуйлаташ шогалтеныт. Коллективым сайын кучаш тыршен, йӱшӧ-влаклан эрыкым пуэн огыл. Дисциплине шотышто мутшо пеҥгыде да чоткыдо лийын. Олян-олян йырже марий пашаеҥ-влакат чумыргеныт. Участкын офисше лийын огылат, вуйлатыше-влаклан посна зданийым чоҥаш ойым ыштен. Участкыште автомобиль висам вераҥдыме годым воктенже офисымат нӧлтал шынденыт. Тиде жапыштак инертный материал-влакым газ йӱлымӧ шокшо юж дене ырыкташ тӱҥалыныт. Тошто ырыктыше регистр-влак укешке лектынытат, тидлан у конструкций кӱлын. У решенийым кычал муаш манын, Николай Ямлыкиевич моло предприятий-влак дене кылым ыштен.

КПД трест Н.Я. Янситовын пашажым кӱкшын аклен. 2015 ий 18 июльышто тудлан «Заслуженный строитель Республики Башкортостан» чап лӱмым пуымо.

Н. Янситов 1958 ий 6 июньышто Мишкан районысо Тӧргымдӱр ялеш шочын. Ольга пелашыж дене пырля ик ӱдырым, Людмилам, ончен куштеныт. Кызыт кок эрге уныкашт уло.

Тений пагалыме землякланна 60 ий теме. Тугат тудо ончыкыжат пашам ышташ шона. Николай Ямлыкиевич, юбилейда да кӱкшӧ чап лӱмда дене шокшын-шокшын саламлена. Тендан чапда - мемнанат чапна, Пошкырт кундемысе чыла марий-влакынат чапышт.

А. ФАДЕЕВ.

Снимкыште: С. Молчанов Н. Янситовлан (пурлаште) чап лӱмым кучыкта. 2015 ий.