Шочмо ял верч кажне тыршышаш

Кумда уремым кеҥежым шаршудо ужарта. Ирик Искандарович кодший кеҥежым Камилла уныкажлан модашыже песочницым ыштен. Тидлан пӧртшӧ ваштареш яра верым эрыктен шынден. Тений поро пашажым умбакыже шуяш шонен пыштен. Кум лӱҥгалтышым, качалке семын йӧнештарыме эше кок лӱҥгалтыме пӱкеным пеш устан ямдыленыт. Йоча-влаклан шинчын каналташ тенгылым вераҥденыт. Песочницым гын изи пӧрт гай сӧрастареныт. Йӱр деч аралалташ профнастил леведышым келыштареныт. Йырже поликарбонат гыч чылдар гай мотор тӱрым пӱчмӧ. Ӱлыл ужашыжым, ошма ынже його манын, профнастил дене петырыме. Чылажымат сылне чия дене чиялтыме. Площадке моткоч йытыра лийын шинчын. Кызыт Ирик Искандарович курыкым да карусельым ямдыла. Кӱртньӧ конструкций-влакым Володя веҥыж дене варитленыт, пошкудышто илыше Сергей Ибяев сварка шотышто полышкала. Ирик изай чыла материалым шкеак муэда, оксамат нигӧ деч поген огыл. Чыла пашам тудо шке кумылын шукта.

«Мый Акпарс ялыште шочын-кушкынам, тыштак ешем дене илем. Шочмо ял верч кажне тыршышаш. Уремыштына шагал огыл икшыве кушкеш, тек нунын йоча жапышт шарнымашеш кодеш. Тидым ме шке огыл гын, кӧ ышта?» - пеҥгыдын ойла Ирик Искандарович.

Ирикын пошкудыжо, Свелана Исламова, воктекем лишемын, тыгерак каласыш: «Пеш кугу тау изайлан. Сай йоча площадкым ыштышт. Ынде икшыве-влак верч тургыжланышаш уке. Ончыч урем мучко куржталыт ыле, ынде пырля модыт. Вес урем гычат погынат, ола гыч унала толшо ӱдыр-рвезе-влакланат тыште пеш келша. Кертме семын меат полшаш лектына».

Вес пошкудыжо Зоя Ибяеват куанжым ыш шылте: «Уремна изи, ик еш гай илена. Ваш сырен огына кошт, чыла йодышым пырля каҥашена. Пеш кугу ракмат Ириклан. Уныкам-влаклан площадке пеш келшен, тиде йоча-влаклан кугу пӧлек. Уремна тӱзланымылан чот куаненна!»

«Ирик Искандарович, уремланна у сыным пурташ, йоча площадкым ышташ манын, чот тыршыш. Тау тудлан.Йочана-влак пеш йывыртеныт», - иктешлыш Людмила Тухватова.

Еҥ-влак тыште чынжымак пашаче да уста улыт. Чапле йоча площадкым ыштеныт, тыгайже моло районлаште укеат, очыни. Тыште эреак икшыве-влакын юарлыме йӱкышт шокта. Келшен илыше, вашла полшышо уремын, ялын ончыкылыкышт уло!

Г. АХМЕТШИНА.

Снимкыште: Йоча-влакын куанышт нимучашдыме!