Сай математик ыле

В.Е. Исиметов - Янбатыр марий ялын эргыже. Тудо 1953 ий 5 январьыште шочын.

Ешыште ача-аважын эн кугу эргышт семын кок шӱжаржылан да кок шольыжлан пример лийын. Ялыште илымек, мӱкшым ончаш, кӱтӱм кӱташ, моло пашамат ышташ верештын. Изинек пашалан патыр улмаш.

Шым ияш пошкудо Чолко ялысе школыш икымше классыш кошташ тӱҥалын. Икымше туныктышыжо, фронтовик-орденоносец А.В. Васильев лудаш, возаш, шотлаш, еҥым пагалаш туныктен. Визымше классыш Шопкер школыш тунемаш толын. Тунам интернат лийын огыл. Ӧрдыж ялласе тунемше-влак родо-шочшышт дене иленыт. Виталий пеш тыршен тунемын, спортлан шӱмаҥын. Эн йӧратыме предметше-влак математика, геометрий, физика да химий лийыныт. Аттестатыштыже нине предмет-влак дене «визытан» отметка-влак гына. Тунамак математик лияш шонен пыштен. Шопкер школышто сай математик Е.Ш. Шайдуллин (тудат фронтовик-орденоносец) Виталийым математика корныш виктарен.

1969 ийыште Красный Урюш селаште кыдалаш школым тунем лектын да Чабык школышто математикым туныкташ тӱҥалын. Вес ийжылан, вступительный экзаменым сайын кучен, Бирск пединститутын физико-математический факультетышкыже тунемаш пурен. 1975 ийыште дипломым налын да распределений почеш Нуриман районысо Чандар школышто математиклан ышташ тӱҥалын. Кок ий гыч Павловка пашазе поселкыш илаш куснен. Тусо СПТУ-што физик-математиклан тыршен. Училищыште ыштымыж годым ий еда мемнан школышкат курсант-влакым погаш толеш ыле. Егорычым пеш сайын палымылан кӧра мемнан ял эрге-влакат Павловка поселкышто шукын тунемыныт. Егорычын воспитанникше-влак тӱрлӧ вере пашам ыштат, тудым сайын шарнат.

Виталий Егорович еҥым колышт моштен, шкенжын ойлымыжымат колыштын шер ок тем ыле: кажне мутшо кӱлешан да оҥай лийын. 1990-2013 ийлаште Павловкысо кыдалаш школышто тыршен: йоча-влакым физикылан, математикылан да информатикылан шӱмаҥден. Школышто да поселкышо ятыр мер пашам шуктен. Семинарлаште, научно-практический конференцийлаште докладым ыштен, районысо математик-влакым паша опытшо дене палдарен, информатика кружокым вӱден, моло вереат шуын. Арамлан огыл 1995 ий 15 июльышто «Башкортостан Республикысе образованийын отличникше» лӱмым пуэныт. Икымше квалификаций категориян туныктышо лийын. 2013 ий кеҥежым сулен налме канышыш лектын.

1976 ийыште Надежда Михайловна (Павловка гыч марий ӱдыр) дене ешым погеныт да 42 ий пырля иленыт. Ӱдыр ден эргым ончен куштеныт, кум уныкашт уло. Ӱдырышт туныктышылан, эргышт программистлан ыштат.

В.Е. Исиметов илышыште пеш шуко шарнымашым да келге кышам коден, вет тудо пеш сай туныктышо да уҥган воспитатель ыле.

Шопкер - Павловка.