Ик ешлан - кум медаль

Валентина ден Сергей Петровмыт ятыр ий Амурский областьысе Райчихинск олаште иленыт, пограничный войскаште служитленыт. Сергей Зайнашевич, Мишкан район Измарий ял гыч, 30 ий элнан чекшым арален, майор званий дене 2012 ий декабрьыште сулен налме канышыш лектын. Валентина пелашыжат, Тынбай ял гыч, пограничный службылан 20 ийым пӧлеклен да прапорщик званий дене пенсийыш лектын. 2013 ийыште нуно шочмо кундемыш пӧртылыныт, Пӱрӧ олаште шке чоҥымо пӧртыштышт илат. Вате-марий кок эргым ончен куштеныт, нунылан кӱшыл шинчымашым пуэныт. Кугурак эргышт, Дмитрий, ача-аваже семынак 8 ий элнан чекшым арален. Кызыт ешыж дене Пӱрӧ олаште ила, полицийын офицерже. Петровмытын изирак эргышт, Алексей, армий радамыште служитлен. Кызыт пелашыж дене Амурский областьысе Благовещенск олаште ила да «Мегафон» компанийыште пашам ышта. Шукерте огыл Петровмыт компанийын директоржо деч эргыштын пашам сайын ыштымыжлан тауштымо серышым налыныт.

28 майыште Пӱрӧ олаште пограничник-влак Кугу Отечественный сарыште кредалше ден воин-интернационалист-влакын памятникышт воктек пеледышым пыштеныт. Вара оласе тӱвыра пӧртыштӧ Пограничник кечылан пӧлеклыме митинг лийын. Пӱрӧ олан вуйлатышыже, районысо военный комиссариатын еҥже-влак саламлыме мутым ойленыт. А Пӱрӧ оласе военкоматын пашаеҥже

Ю. Евдокимов погранслужбын ветеранже-влаклан «Пограничный войскалан - 100 ий» медальым кучыктен. Валентина ден Сергей Петровмыт, тыгак нунын Дмитрий эргыштат юбилейный медальым налыныт. Пограничный службын ветеранже-влак лӱм дене митингыште С. Петров мутым ойлен. Торжественный пайрем концерт дене мучашлалтын.

А. КУЗНЕЦОВА.