Илышыште поро кыша шергакан

Ынде пенсийыште улеш: суртвольыкым да пакчам онча, моло сомылым ыштылеш. Валентина ватыж дене коктын ныл йочам кугемденыт. Ынде кугезе коча-кова улыт: Анжела уныкаштын изиже уло.

Айдеме пашаж дене чаплана. Тынар ийыште ыштыме тонно-километржым шотлет гын, экватор йыр савырнен, Курмызакыш мӧҥгеш толын шуаш лиеш. Тыге тудо, пенсийыш лекмешке, 42 ий шоферлан ыштен. Армий гыч пӧртылмыжымат, ӱдырым налмыжымат шарнем. Фрунзе ола гыч САЗ-ым кондыш, у самосвал дене ышташ тӱҥале. Шошым ӱдымаште, пареҥгым шындымаште, вара, шурным поген пытарымешке, комбайн дене ыштыш.

Тошто «Нива» комбайн дене шурным погымым шарнем. Тунам пурса пеш чот умен ыле. Бункерыш ястараш тӱҥальым - ремень кӱрльӧ. Мом ышташ? Ваня чӱчӱ кузовышто шога, ведра-влакым ястара. А ме бункер гыч кошталын пуэдена. Шукын улына, воктеннак - пожарный машина, «Техпомощь». Тыгай весела пагыт-влак ыльыч… Бортовой машинаш тентым шупшын шынденыт да телымат паша верыш еҥ-влакым тыге шупшыктеныт (Автобус тунам уке ыле.). Бирск олаш тракторым ачалаш але запчастьлан шуко коштылтын. Тунам механиклан ыштыше Александр Исадыков шарналтен ойла ыле: «Икана опытный озанлыкыш каена. Корнышто шогышо еҥым шындыман, теле кече вет. Изи ӱдыр ден аважат тушкак каят. Пашазе-влак коклаште шаярче лиеш. «Все сели. Трогай, Маруся», - малдалеш. Машина тарвана. Миен шумеке, изи ӱдыр, кабин дек лишемын, «Спасибо, тетенька» манеш. Вара аваж дек савырнен, «А там не тетенька, дядя за рулем» ӧрын пелешта. Кузовышто рӱж воштыл колтат. Изи ӱдыр тушто чынак Маруся манын умылен.

Алевтина Ивановна фельдшерлан ыштыш, ынде пенсийыште улеш. «Бирскыш больницыш еҥым наҥгаяш кӱлеш - иканат ок лий манын огыл. Шофер-влакат тӱрлӧ лийыт: иктыже ноен, канымыже шуэш, весыжын рульжо ок пӧрд. Телым пелйӱдым миен кынелтем - тарвана. Корнышто азам ыштыше ӱдырамаш-влакат лийыныт. Вара изи йоча-влак «Ваня кочай» маныт ыле», - шарнен каласкала тудо.

Гена Байгузин, совхозын прорабше, шарналтен ойла: «Дядя Ваня дене кушеч гына материалым шупшыктен огынал. Катав-Ивановск да Стерлитамак гыч цементым конденна. Нефтекамск, Уфа, Белорецк, Салават да моло вереат шуылтын. Корныштат малалтын, икте-весым алмаштен, йӱдвошт толмо пагыт-влакат лийыныт».

Пошкудо йоча-влак дене чумырген, лӱйкален модына ыле. Оружий ситен огыл, садлан Ваня чӱчӱ оҥа пӱчкыш-влакым пуэн, а Веня шольыжо (Тудо мемнан деч кугурак, кидпашалан уста, вара строитель лие.) мыланна автомат ден пулемет-влакым ышташ полшен. Вара пакчаште, окопым кӱнчен, лум кандар дене кышкылтынна. Кеҥежым коктын-кумытын чумырген миеннат, «Веня чӱчӱ, ӱпым налын пуэт ала?» йодынна. Капка воктек пӱкеным шындат, парикмахерскийым почеш ыле. «Под польку», «котовский» - кӧлан могай прическа келшен, тугайым ыштен.

…Ик эрдене урем дене волен кайышым, саламлалтна. Капка ончылно лумым куа ыле. Кужу ӱмыран лий, «дядя Ваня».

Л. ЯПАРОВ.