Шӱмышт шокшо, пашашт поро

12 апрельыште Уфа олаште республикыште илыше изи талешке-влакым «Горячее сердце» нагрудный знак дене палемденыт. Башкортостан гыч тиде наградым тений 10 йоча налын. Чулым рвезе-влаклан наградым РФ-н Башкортостан Республикысе тӱҥ федерал инспекторжо Михаил Закомалдин кучыктен. Чыла йоча тудын кидше гыч дипломым, «Горячее сердце» нагрудный знакым да Чап книгам налын.

Талешке-влак коклаште Шаран районысо Акпарс ял гыч кок марий рвезе - Ильгиз Далжанов ден Артем Урсаеват (снимкыште) - улыт. Нуно шке йолташыштым вӱдыш пурен кайыме деч утареныт.

Артем ден Ильгиз нерген Чап книган 53-шо лаштыкыштыже лудаш лиеш. Пӧлек шотеш йоча-влаклан «Орленок» Всероссийский йоча рӱдерыш канаш каяш кеҥежым путевкым пуат.

Г. АХМЕТШИНА.