Тул гай ӱдырамаш: моторан пушымат, снегоходымат виктара

Мемнан районысо Чабык ялыште «тул гай» ӱдырамаш ила: тудын нерген «Чыгыныше имньымат чарен шогалтен, йӱлышӧ пӧртышкат пурен кертеш» манаш лиеш. Тиде - коло ий утла почтальонлан тыршыше Алена Алеева.

Алена Аркуловна Новоянсаитово почта связь пӧлка гыч Октябрьский, Кызыл-Куль, Атамановка, Знаменка, Кӱшыл да Ӱлыл Тургенеево, Чабык яллаш почтым кондыштара. Тиде ял-влак Уфимка эҥер воктене верланеныт, садлан тудлан шкаланже йӧнан транспортым виктараш тунемаш верештын. Телым «Рысь» снегоход дене, кеҥежым эҥер мучко моторан пуш дене 30 километрым мӧҥгеш-оньыш коштын савырна. Каласаш кӱлеш, техникыжым шкеак эскерен, ачален мошта, кӱлеш годымжо почтым шупшыктышо автомашина дене коштшо пӧръеҥ-влакым полшаш йодеш.

Аленалан пеҥгыдемдыме яллаште шукыжым илалшырак еҥ-влак илат. Нуно почтальоныштын газет-журналым, серышым, посылкым гына огыл, южо яллаште кевыт йотке укелан кӧра моло йодмо сатуштым налын мийымыжымат вучат.

Алена Володя пелашыжын ӱмыржӧ лугыч лийме деч вара Башкир аграрный университетын кокымшо курсыштыжо тунемше Ольга ӱдыржӧ дене ила. Вӱта тич вольыкым ашна, кеҥежым ик кугу пакча пареҥгым, тӱрлӧ емыжым, пеледышым ончен кушта. Йӧратыме пашажланат, сурт коклаште шогылташат жапым муэш.

А.А. Алеевам кужу жап пашам тыршен ыштымыжлан кодший Башкортостан Республикын Чап грамотыж дене палемденыт. Тудым Уфаште республика Вуйлык Рустэм Хамитов кучыктен (снимкыште).

А эше пагалыме почтальоным шукерте огыл Россий телевиденийын НТВ каналже дене ончыктышт. Ынде тудым эл мучко палат.

Г. САЛИКОВ.