Тӱвыргӧ лектышыж дене кугешнена

1968-ше ий 30-шо мартыште Галина ден Александр Шамратовмытын ешыште визымше икшыве шочын. Тудлан Володя лӱмым пуэныт. Кыдалаш школым сайын тунем лекмеке, рвезе Бирск оласе ДОСААФ-ыште «шофёр-электромеханик» специальностьым налын. 1986-шо ий гыч 1988-ше ий марте Германийысе Цербст олаште эл ончылно порысшым шуктен - танковый войскаште служитлен, наводчик-оператор гыч тӱҥалын, танкын командирже марте кушкын. Армийыште лийме жапше Владимир Александровичын илыш-корныштыжо кугу верым айла. Тушто шуаралтмыже кажне кечын шуктымо пашаштыже палдырна. Мутым пеҥгыдын кучаш, сай лектыш верч пашам тыршен ышташ, тунемшын койышыжым ужын да шижын мошташ, йоча-влак дене пеҥгыде кылым кучаш, ик ойыш шуаш тыршымаш - тудын койышыж гыч тӱҥ ойыртемже-влак.

Армий гыч пöртылмеке, Володя Кумертау оласе физкультур техникумыш тунемаш пурен да 1991-ше ийыште дипломан специалист лийын лектын. ДЮСШ-ан пашаеҥже лиймеке, тудым шочмо ялышкыже тренер-преподавательлан шогалтеныт. Лач тиде жап гыч ойырен налме пашажым туныктышо ӱшанлын шукта - самырык тукымым спортым йöраташ да таза илыш-йӱлам кучаш кумылаҥда. Кир спортым вияҥдымаште школна районышто ик эн виян, опорныйлан шотлалтеш манам гынат, йоҥылыш ом лий докан. Владимир Александровичын паша лектышыже раш коеш. Тудо кум спорт мастерым

(Д. Шайбаков, А. Кучерявенко, Д. Васильев), спорт мастерыш вич кандидатым (В. Абдулин, В. Якушев, В. Миксонов,

Ю. Ибаева, Р. Ямакаев) куштен. Шкежат спорт мастерыш кандидат улеш. В.А. Шамратовын ятыр воспитанникше районын, республикын чапшым элысе таҥасымашлаште араленыт да аралат - Омск, Рыбинск, Тюмень, Казань, Курган да моло олалаште вийыштым тергеныт. Тудын воспитанникше-влак гыч Башкирийын икымше чемпионжылан Р. Шамыкаев ден В. Абдулин шотлалтыт. Пытартыш жапыште С. Ямакаев Томск олаште, Д. Минаев Сургутышто уда огыл лектышым ончыктеныт. Эрге-влак дене пырля спортын тиде видыштыже ӱдыр-влакат шуаралтыныт, республикын чемпионжо марте шуыныт. Тиде Ю. Ибаева, М. Миксонова, К. Минаева, М. Баязова, С. Абдулина, Л. Исадыкова, А. Ярмингина. Владимир Александрович шуко тунемшыжым поро мут дене шарна: Юлий ден Юрий Яметовмытым, С. Николаевым, О. Миксоновым, А. Николаевым, Ж. Шамратовым,А. Ивановым, М. Шемадовым, В. Яндыгановым, Ю. Шамыкаевым, А. Ильмурзиным, Ю. Ермолаевым, Д. Алкаевым, Д. Шамшиевым, Е. Иркабаевым да молымат. Южышт кызытат тиде спорт дене тунемме але пашам ыштыме верыштын чапшым аралат. Сургут олаште тунемше Тынбай рвезе Е. Иркабаев кирым нӧлты-маште ятыр гана сеҥымашке шуын. Д. Шайбаков, А. Кучерявенко, Д. Васильев, тунем лектын, пашам ыштат, ешым ончат, туге гынат йöратыме спортлан жапым ойырат да у сеҥымашышт дене куандарат. Тыште тренерын надырже пешат кугу.

Кир спортым спартакиада гыч кораҥдымеке, Владимир Александрович пытартыш жапыште тунемше-влакым ӱстел теннислан кумылаҥда. Но ялысе самырык-влак, кöн чонышкыжо кирым нöлтымаш, спортым йöратымаш чотак шыҥеныт, туныктышышт деке тренировкыш коштыт, ой-каҥашым йодыт, тазалыкыштым шуарат.

Ӱстел теннис денат сеҥымаш-влак куандарат. Р. Шамыкаев ден М. Миксонова икымше гана республикыште сеҥыше да призёр лийыныт. Тиде тунемме ийыште Нефтекамск олаште теннис дене Республикысе кубокын черетан этапыштыже Р. Ермолаева икымше да А. Ибатова кумшо верым налыныт. Уфасе Виш первенствыште К. Шамыков кумшо лийын. Икманаш, Владимир Александрович шке тунемшыже-влак дене, а нунышт шке тренерышт дене кугешнен кертыт.

Паша лектышыжым аклен, 2004-ше ийыште тудым «Башкортостан Республикысе физический культурын да спортын эн сай пашаеҥже», 2013-шо ийыште «Башкортостан Республикысе образованийын отличникше» знак дене палемденыт.

Владимир Александрович Светлана пелашыж дене кум икшывым ончен куштат. Татьяна Уфа оласе БГУ-што социологий да философий факультетыште, Алексей луымшо, Олег кумшо класслаште тунемыт. Ешыште чыланат спорт дене кылым кучат. Светлана пелашыже жапыштыже ече дене республикын чемпионжо лийын, Таня баскетбол да теннис дене школын, районын чапшым арален, Алексей физкультура дене районысо олимпиадыште кок ий почела икымше верым сеҥен налын, республикысе олимпиадыш ушнен, Олег теннис дене модаш йöрата - Нефтекамск, Уфа олалаште вийжым терген. Тыге келшен, икте-весылан полшен, спорт дене кылым кучен ила Шамратовмыт еш. Кунам ешыште чыла сай, тунам паша лектышат куандара. Меат, пашам пырля ыштыше коллегыже-влак, Владимир Александровичым пел курымаш лӱмгечыж дене саламлена.

Н. МИНАЕВА, Тынбай школын туныктышыжо.

Снимкыште: В. Шамратов.

Еш архив гыч налме фото.