Пиал кажне еҥын шке кидыштыже

Тудо Павасола ялысе кресаньык ешеш шочын. Изинек нелылыкым шижаш пернен гынат, тиде поро ӱдырамашын илыш корныжо икмардан эртен. Меҥылбика аваже - Павасола ялынак уста ӱдыржӧ, ачаже, Андрей Аймурзин, - ешыште кумшо икшыве. Нуно, ныл изак-шоляк, татун кушкыныт, но кугу согыш гыч нылытынат пӧртылын огытыл. Уло сурт сомыл самырык ӱдырлан логалын. 1955-ше ийыште Изенам сӧснам ончаш шогалтеныт. Тиде куштылго паша огыл - чыла кид дене ышташ логалын. Вачӱмбалне вӱдым нумалаш, пум пӱчкаш, сӧсналан кугу подеш апрам шолташ кӱлын. Сӧснаиге-влакым аза семын ончаш пернен, кажне шочшо иге верч тыршен. Тунам кажне кеҥежлан лагерьым Танып воктек кусареныт. Пашашке шым уштышым эр-кас йолын коштыныт, сӧснам пукшеныт, кӱтеныт. Варарак ялыште ушкал фермым почыныт. Пашам шуктен ыштыше ӱдырамашым шочшо презе-влакым ончаш йодыныт. Тыштат уло кумылын тыршен ыштен. Илен-толын, 1960-шо ийыште, Калмия эҥер воктен у фермым чоҥеныт, иган ава-влакым ончаш адакат Изенам шогалтеныт. Тудлан эн неле пашам ӱшаненыт. Яшлыклаш шыдаҥым ӱден, игылан ужар озымым пукшеныт, а телылан мланде ужар карасым ямдылен коденыт. 1970-ше ийыште кугу сӧсна фермым Павасолаш кусареныт. Вӱта кермыч гыч чоҥымо, кугу, волгыдо лийын, сӧснат шагал огыл шотлалтын. Изенам тӱж ава сӧсна-влакым ончаш шогалтеныт. Тиде паша эше утларак тӱткышым йодеш. Тыгай пашаче ӱдырамашлан «Сӧснам устан ончышо» лӱмым пуаш кӱлеш. Киносо семын Москвашкат колташ лиеш ыле. Тунам ферме вуйлатыше эре вашталтын - кажне кандаш еҥын шке койышыжо, пашам вӱден моштымыжо, йодмашыже, умылымашыже.

Тыршен ыштыше, пашалан вуйын шогышо ӱдырамашым район депутатлан сайленыт, ятыр гана Чап грамот дене палемденыт.

Паша паша дене, а ешыште икшыве, вольык, пакча… Изена акана ныл йочалан аваштым алмаштен (Тунам изи Люба шке аваж деч куд тылзаш веле кодын.). Андрей пелашыжат, канаш лекмешкыже, колхозышто тыршен, бензиным, соляркым шупшыктен. Коктын кум эргым да кум ӱдырым ончен кугемденыт. Нуным ончен куанет, чыланат ешаҥыныт, пашам ыштат, икшывым куштат, авашт дек эре толын коштыт. Изена кувавайым лу уныкаже куандара. Пагалыме Изена акайнам юбилейже дене саламлена, тазалыкым, кужу ӱмырым тыланена.

А. КУГУБАЕВ, ончычсо ферме вуйлатыше, «Чолман» газетым лекмыж годсек йӧратен лудшо.