Кеч-могай пашаштат ончылно лияш тырша

Пайрем вашеш Йывангасола школышто туныктышылан да завучлан пашам ыштыше Н.Э. Шуматова нерген мут ярымем шуйынем.

Наталья Шуматова изи, мотор, сылне Ведрес ялыште 1981 ий идым тылзын 16-шо кечыштыже шочын. Йоча жапше, моло икшывын гаяк, модын, юарлен, тунемын, пашалан кумылаҥын эртен. Икымше гыч индешымше класс марте Йывангасола пелекыдалаш школышто шинчымашым поген. Сайын тунемын, чолга койыш-шоктышан лийын. Тӱрлӧ конкурслаште, фестивальлаште, олимпиадылаште вийым терген, но музыкым да йылмым моло предмет деч утларак йӧратен. Тунамак йылмызе лияш шонен. Урок-влак деч вара «Ший оҥгыр» кружокыш кушташ коштын. Шке мастарлыкыштым «Мурпеледыш» фестивальыште да моло вере ончыктеныт.

1996 ийыште ӱдыр Благовещенск педагогический колледжын студент ешышкыже ушнен. Тунем лекмеке, 2000 ийыште шочмо школышкыжо марий йылме туныктышылан пашам ышташ толын. Икмыняр ий гыч М. Акмулла лӱмеш Башкир кугыжаныш педуниверситетыш тунемаш пурен.

2001 ийыште ешым поген. Кызыт Катя ӱдырышт Нефтекамск оласе 3-шо школышто индешымше классыште тунемеш. Музыклан шӱман, шымше ий музыкальный школышто флейта дене шокташ тунемеш. Шочмо йылме дене почеламутым сылнын каласкалыме оласе конкурсышто вич ий почела сеҥышыш лектын.

Наталья Эриковнан сай пашаже раш коеш: ӱдыр-рвезе-влак туныктышыштым уло шӱм-чон дене йӧратат да пагалат. Тудо шуко йочам музыклан шӱмаҥден. Теве Наталья Алынбековат икымше - индешымше класслаште тунеммыж годым Наталья Эриковнан вӱдымӧ кружокыш коштын. «Весенняя капель» республикысе, «Восходящая звезда» район конкурслаште икымше верлам наледен. Кызыт Сарапул педколледжын физкультур отделенийыштыже тунемеш гынат, музыкым ок кудалте, муро конкурслаште тугак ончыл верлам наледа. Наталья Эриковнан тунемшыже-влак район олимпиадыште, шымлыме паша дене, сочинений конкурслаште эре призовой верым налын шогат.

Н.Э. Шуматова 2010 ий гыч завучлан пашам ышта, икымше категориян туныктышо улеш. Шке вийжым, жапшым чаманыде, чыла ыштен шукта, кеч-могай пашаштат эре ончылно лияш тырша. Тыгак мемнан Йывангасола культура пӧртын художественный самодеятельностьшын чолга участникше улеш. Марла газет-журнал-влакым лудаш йӧрата да йоча-влакым марий улмышт дене эре кугешнаш, шкенан шочмо йылмым йӧраташ кумылаҥда. Вет ава шӧреш вийым налше йылмына йымыжа да ныжыл, шыма да мотор, тунамак куатле да кӱдыратле, шочмо кундемнам йӧраташ да пашаче калыкна дене кугешнаш туныкта.

Ме тиде чолга, поро, чылажымат писын гына ыштен шуктышо, шке пашам уло шӱм-чон дене йӧратыше туныктышо дене кугешнена. Тек пашаже умбакыжат ушнен толеш да тӱвыргӧ саскам пуэн шога! Тунемше-влак лӱм дене Наталья Эриковналан пеҥгыде тазалыкым, ушан тунемше-влакым тыланен кодам.

Тек эрта ий почеш вес идалык,

Тек перна але шуко ужаш.

Тыланда ойлем, вуйым савалын:

- Тау лийже, Учитель йолташ!

Л. АЛЫНБЕКОВА, Йывангасола т9выра пºртын вуйлатышыже.

Краснокам район.

Еш архив гыч налме фото.