Калыклан шуко пӧртым чоҥат

Каменщик-влакын конкурсыштышт мемнан ола гыч «Нефтекамскстройзаказчик» муниципал унитарный предприятийын командыжат мастарлыкшым ончыктен. «Кодший шкенан организацийыште профессионал мастарлык конкурсышто икымше лийынам ыле,

но республикысе конкурсыш каяш шым келше… Тиде ганаже мыламак олан чапшым аралаш пӱрен улмаш», - каласкалыш Уфаш коштын толмыж деч вара вашлиймына годым марий рвезе Александр Яманаев.

Тений республикысе конкурсыш 6 ола гыч 16 команда миен. Кажныштыже кок каменщик лийын. Тӱҥалтышлан кажне командылан кок шагатат пеле жапыште кум кубический метр кумдык пырдыжым опташ заданийым пуэныт. Тудым палемдыме жапыште 4 команда гына тӱрыс шуктен. Жюри кермычым тӧр, чын оптымым, ушем кӱжгытым, лукым кузе савырымым тӱткын терген. Тылеч вара участник-влак теорий йодыш-влаклан вашештеныт. Иктешлыме почеш Башкортостанысе чоҥышо-влакын XI профессионал мастарлык конкурсыштышт «Нефтекамскстройзаказчик» МУП-ын командыже - Александр Яманаев да Артем Якупов кокымшо верым налыныт.

Александр - 5-ше разрядан каменщик. Ты организацийыш 2009-ше ийыште, Нефтекамск нефтяной колледжыште мастерлан да 27-ше профессионал лицейыште каменщиклан тунем лекмек, пашаш толын. Профессийже куштылго огыл: вий-куатым, чытышым, пеҥгыдылыкым, сай тазалыкым йодеш, но суапле, тудын дене кугешнен кертшашлык. Олан сынжым вашталтымаште, илыме пӧрт-влакым, йочасадым да моло объектым чоҥымаште Александр Яманаевынат надырже уло.

Шкенжын мутшо почеш, илышыште могай профессийым ойырымо шотышто тудо нигунам коктеланен огыл - ачажын пашажым, оласе «Ротково» микрорайонышто ешлан пӧртым шке чоҥымым изинек ужын кушкын. Кокымшо пӧртым ыштыме годым полышкалашат кушкын шуын. Ончыкыжым шке ешыжланат «Самырык еш» программа почеш Крымсарайыште ойырымо мландеш шке кид денак суртым нӧлташ шонымаш дене ила.

Э. АПТУЛМАНОВА.