+23 °С
Дождь
Айдеме да пӱртӱс
19 Июля , 03:18
Мо тыгай чыҥла?
Чыҥла - кеҥежым эн шокшо, телым эн йӱштӧ жап. Тиде мут Маядык ялын лексикышкыже татар йылме гыч пурен, татарлаже «чиллә» лиеш. Тидын нерген мыланем ялыштына илыше шоҥгырак еҥ-влак каласкалышт.
Л. Гимаеван фотожо.
«ЧОЛМАН» ГАЗЕТЫМ МАX-ЫШТЕ ЛУДЫНА!
Чыҥла кок тӱрлӧ лиеш: кеҥеж чыҥла да теле чыҥла. Кокытшат 40 кече - кеҥеж чыҥла 24 июнь гыч 3 август марте, теле чыҥла 24 декабрь гыч 3 февраль марте - шуйна. Кеҥежым тиде жап эн шокшо, южо кечын 35 градус дечат шокшырак лиеш. Садлан тугодым тӱрлӧ пашамат эр да кас гына ыштат, чот шокшо жапыште еҥ-влак ӱшыкыштӧ лияш тыршат. Телым тиде - эн йӱштӧ жап («рождественский», «крещенский, «афанасиевский» маныт). Телым йӱштӧ деч шокшо верыш шылыт.
Кызыт шудо тургым. Шыркаҥше, пеледше шудын эн виян жапше. Соло да йӱреш нӧртыде поген веле шукто - вольыклан ситыше курго лиеш.
Кеҥеж - мончалан выньыкым ямдылыме жап. Выньыкым чыҥлаште гына ыштыман. Лышташыже ньымыра огыл, тугеже, шуын. Мончаште кыралтме годым тыгай выньыкын лышташыже огеш його. Шем куэ выньыкшым чыҥлан пытартыш кечыштыже ямдылет гын, выньык пайдалырак лиеш.
Вӱдыш эр да кас пураш тыршат, уке гын тӱрвӧ оварен лектеш, маныт.
Кеҥеж чыҥла годым коҥгам опташ, монча коҥгам ышташ, кӱжым алмашташ ок йӧрӧ. Киндым кышкаш коҥгаш эр юалге дене гына олтат, пожар лийын кертме деч шекланат. Тиде кечылаште куштылго ошалге але волгыдо тӱсан вургемым чият. Вуйым от левед гын, аҥыргаш лиеш, вуй коршташ тӱҥал кертеш.
Чыҥла жапыште ыштышаш йӧнан паша-влакат улыт. Мутлан, туврашыш (пӧрткоклашке) рокым чыҥла годым гына оптыман. Тыге рок писын кошка. Телымсе чыҥла годым сорта дене кылдалтше сомылым ыштыман огыл.
