+17 °С
Ясно
Айдеме да пӱртӱс
2 Июля , 04:14
Йӱксӧ ер - пӱртӱсын сылне лукшо
Башкортостан Республика шинчам куандарыше, каналташ йӧнан ятыр мотор вер-шӧрлан поян улмыж дене ойыртемалтеш. Ер серыште мужыр йӱксӧ шинчыман пӱртӱсын ик тыгай мотор лукшо Бурай районысо Старотазларово ял лишне верланен. Татарла «Аккош куле» манын возымо лӱмжат тугак кусаралтеш - «Йӱксӧ ер».
Вер-шӧрым тыгай оҥай арт-объект-влак сӧрастарат. Авторын фотожо-влак.
Йӱксӧ ер воктене.
«ЧОЛМАН» ГАЗЕТЫМ МАX-ЫШТЕ ЛУДЫНА!
Тиде оҥай вер-шӧр воктеч машина дене эртен кудалше корныеҥ-влак тышан чарналташ да пурен ончалашак тыршат. Тушко лӱмын каналташ мийыше-влакат улыт. Ерым йырым-йыр, шке помышышкыжӧ ӧндалме гай, моторын ужар чодыра авырен шога. А ер деке ошкылмо вер-шӧрым туге моторын сӧрастарыме - ончен шерет ок тем. Оҥай арт-объект, мультфильм гыч йӧратыме персонаж-влак кажне корныеҥым вучымо уна семын вашлийыт, кумылым нӧлтат. Тыште мераҥже, шордыжо, уржо, молыжат - чылажымат моткочак устан келыштарыме. Ошкылашлан тротуар корным вакшме, шинчын каналташ мотор теҥгыл-влакым вераҥдыме, волгалтарыше тулан меҥге-влакым шогалтыме. Иман пушеҥге деч шарлыше южшымат шӱлалташ пешат куштылго, каньыле.
25 метр кумдыкан, 5,5 метр утла келгытан ер - пуйто воштончыш. Кечан игечыште тушко ончалме годым вӱдыштӧ вуй ӱмбалсе кава, пыл, йырысе пушеҥге-влак пешат раш койыт. Вӱдшӧ канде-канде, яндар. Ямле сӱрет!
Ер республикыште пӱр-тӱсыштӧ карст гыч лийше (мланде йымач йоген лекше вӱд) эн кугу памашлан шотлалтеш. Тудын пайдале минеральный веществалан поян улмыжо нергенат колаш лиеш.
Йӱксӧ ерын лӱмжӧ очыни калыкыште ятыр ий илыше шӱлыкан легенда дене кылдалтын. Ойлат, пуйто кажне шошым тиде сылне ерыш йӱксӧ мужыр чоҥештен толын. Верысе калык нуным пукшен, арален. Йӧратыше самырык мужыр-влак пеленышт икте-весылан ӱшанле улмо нерген товатленыт. Но икана ик осал айдеме ик йӱксыжым лӱяш тоштын. Тулыкеш кодмеке, мужыр пелашыже йӱштӧ телыланат шкетын тиде ерешак кодын. Еҥ-влак тудым чаманеныт, пукшеныт, йокрок илышыжым куштылемдаш тыршеныт. Но шӱлык йӱксӧ йӧсланен. Шкет илышым чытен кертде, шошо шумеке, йӱксӧ трук кӱшкӧ кавашке чоҥештен кӱзен, ер ӱмбалне ик жап пӧрдмеке, осал еҥын кудывечыже йыр чоҥештен савырнен да писын гына мландыш кӱ гай камвозын… Легенда туткарыш шуктышо осал чонан еҥжынат ӱмыржӧ пиалдыме да кӱчык лийме нерген каласкала.
Тачысе кечын ер воктене кечыше ятыр сурам ужаш лиеш. Нуным, пеҥгыде ешым, курымашлык йӧратымашым тыланен, тыште самырык мужыр-влак пижыкташ кумылаҥыныт. А эше ерыш кудалтыме ший оксаштат пиалым сӧра манын ӱшанат…
Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!
