Пешалап

Ончыч Мишкан могырч Козаш марте, а Караидель могырч Потлуп марте корным эрыктеныт. Пешалап эҥерын кок могыржат луман лийын. Кок могырнат машина-влак погынен шогалыныт. Ик теле кечын Ӱткӱстӧ ялын Кулгына Актюбина Шопкерыш унала каяш погынен. Эрок паша дене вашкыше шофер-влак дене Козаш марте шинчын каен. Пешалап эҥер деке миен шумо жаплан тушто уже кок район гыч машина-влак погыненыт улмаш. Но ик тракторат корным эрыкташ лектын огыл. Кулгына акайлан Ӱткӱстӧ машина дене кечывал деч вара мӧҥгӧ пӧртылашыже верештын.

Чевер шошо кечын меат марием дене Бирскыш кайышна. Эрлашыжым автобус дене мӧҥгӧ толаш лекна. Кече онча, лум лумын огыл. Козашым эртышна, Пешалап деке шуна. Автобус умбакыже ыш кай, савырнен шогале. Оҥай, Пешалапын ик могырныжо корнышто лум уке, лийынат огыл, а вес могырныжо кӱжгын шынден. Икмыняр еҥ йолын ошкыльо, а ме Козашеш кодна, Дмитрий Яметовичын суртыштыжо мален лекташ логале. Тудо вараш кодшо корныеҥ-влакым эре малаш пуртен. Эрлашыжым вич шагат эрденак корныш тарванышна, Ӱткӱстӧ марте лумым келын каяш вереште.

Ынде корным сайын эрыктат. Лумжат тунарак келгын огеш воч. Йолын коштшо-влакат огыт кой. А вет тиде эҥерым пенсионер-влак кызытат шарнат, изи гынат, йӱштӧ телым шуко корныеҥым йырже поген, «куштыктен» кертын. Марла ме Пешалап манына, а корнышто «Бишелап» манын возалтын. Умбакыже Пешалап эҥерын вӱдшӧ Репеде эҥер дене ушнен йога.