-22 °С
Пылан
Все новости
Айдеме да пӱртӱс
15 Ӱярня 2025, 10:35
Рвезылык - илыш вийым пуышо памаш
Актуган ял воктене мланде йымач йоген лекше лу утла памаш уло. Нунын кокла гыч иктыже, Рвезылык памаш (Ялысе клуб лишне улмылан кӧра самырык-влак чӱчкыдын тамле вӱдшым йӱаш воленыт. Тыгак сӱан годым самырык мужыр, пайрем калык эре памаш воктене чарналтеныт - верысе калыкын рашемдымыж почеш, лӱмжат тышеч лектын.), ял тӱрысӧ кугорно воктенак верланен.
Авторын фотожо-влак.
Памашын вӱдшӧ шнуй виян Шукын курык йымач шолын йоген лектеш. Кызыт вӱдым налме верыш кӱртньӧ пуч дене йоген толеш. Еҥ-влаклан вӱдым налаш йӧнан да лишылрак лийже манын, курыкысо памашшинча гыч икмыняр ий ончыч лӱмын пучым шуеныт. Актуган ял калыкын мутшо почеш, тиде сомылым шке жапыштыже НГДУ-н 5-ше участкыштыже вуйлатышылан ыштыше Алексей Ибаев тарватен. Суапле пашам илышыш шыҥдарымаште ялысе активист Андреян Исиметовынат надырже кугу (Чаманен каласаш логалеш, тудо шукертак ош тӱня дене чеверласен).
И. Минабашеван колтымо фото-влак.
Памашым коло ий утла ончыч моторын тӱзатеныт. Канде да нарынче тӱс дене чиялтыме, моторын сӧрастарыме кӱртньӧ савар дене авырыме памаш тора гычак волгалтеш. Тушто, йырысе ямле пӱртӱсым, вер-шӧрым йывыртен ончалын, шинчын каналташ теҥгылжат уло. Памашын яндар вӱдшылан Актуган калык гына огыл, машина дене еҥ-влак воктенсе ялла гычат мият. Шоссе корно дене Актуганым эртен кудалше корныеҥат вӱдым темаш чарналта. Калык коклаште чӱчкыдын «Памашын вӱдшӧ тамле, кугу виян» манмым колаш лиеш. Олаште илыше-влакат вий-куатым пуышо вӱдым пеленышт наҥгаяш тыршат. Эше Актуганыште илыше-влак, поснак кугурак тукым, кызытат волакешыже памаш вӱд дене вургемым шӱалташ мият.
Пӱртӱс поянлыкшым нигӧлан ок чамане - кече ваштареш йоген лекше Рвезылык памашын вӱдшӧ калыклан илыш вийым пуа, эмла, сай кумылым пӧлекла.
Новости партнеров