Агарман. Ни кеҥеж, ни шыже огыл

Лышташ тӱр утыр шапалга -

Пӱртӱс чияж дене модеш.

Кеҥеж кас ӱжара шеҥгек вашка,

Кышажым йӱштӧ йӱр мушкеш…

Август. Тений тудо йӱран да ночко ыле. Но чоным сымыстарыше татше нигуш йомын огыл, лектынак шога. Арня мучаште каныш кече годым тидым поснак шижат. А йӱр деч варасе юж озон дене иктак. Поян тылзе. Сонарзе-влаклан - шыже сезоным почмо пагыт. Эрдене колым кучет, кечывалым поҥгым погет, а кастене - сонарыш! Мӧҥгыштӧ йогыланен от кий гын, пӱртӱс лоҥгам шерын кошташ йӧратышылан ик кечыжак мыняр оҥай сӱретым, ойыртемалтше сомылым сӧра! Кава гыч вӱд дене чывылтен «модшо» йӱр, лавырам, кыдал даҥыт ночко шудым келын коштыкта гынат, шодо тич яндар южым шӱлен, паша деч вуйым кандарен коштмылан нимо ок шу! Ушышто у шонымаш шочеш. Нӧренат, ноенат, но кап-кыл у вийым пога. Кеч-мом манат гынат, идалыкын кажне пагытше, тудым шижын, пайдалын кучылт моштет гын, чоныштет ласка кумылым тарватыше палым кода.