Биби

…Укшышто ош пунан изи чумырка утыр кугемеш, нарынче-ужар тӱсым налеш, лышташ шарла, а вӱдыштӧ вичкыж шӱртӧ гай вож шуйна… Тыгак пӱртӱс помыжалтын илана. Изиш варарак комбиге-влакынат би-би-би, би-би-би йӱкышт шокташ тӱҥалеш. А шкешт пуйто эр шошымсо биби! Кидкопаш шыҥыше пушкыдо, нарынче-ужар пунан изи чумырка! Сандене, очыни, озашт комбым дига-дига-дига манын  ӱжеш гын, комбигым би-би-би ышталеш. А тиде сурткайыкым ваҥыше изи йоча воктеч эртыше еҥ «Бибим ваҥет, ие?» - пелешта. Биби - шертне пеледыш да комбиге.

Маядык велне шертне пеледышым «мамай» маныт улмаш. А мыланна, чорай-влаклан, тудо эре биби лиеш. Шкаланже кузе пелештыме утларак келша, ала? «Шертне» каласа ыле дыр да… йылмыже уке. А мыланна, кузе ойлен тунемынна, туге келша. Кок мут кок тӱрлын йоҥгалтеш да возалтеш гынат, садак шошымсо ош мамык пеледышым ончыкта.