Вот тиде теле!

Мый гын эртыше курымын еҥже уламат, тымарте утларак пӱртӱс палым эскеренам да тудлан гына ӱшаненам. Но сото телефонлан кӧра чыла вашталте. 

Икана уныкам Моско гыч у телефоным налын тольо. «О-о-о, пеш чаплыс» манмемлан тудым мыланем пӧлеклыш. Эше тушто игечым кузе ончаш туныктыш. Ынде налам саде у аппаратетым, экраныштак пыл але кече сӱрет коеш, воктенже южын температуржо возалтын. Утларак палынем гын, сӱретыш темдалам, да шушаш вич кечылан могай игече лийшаш лектынат шинчеш. Кугу шинчалыкемым нер ӱмбак шындем да чыла шерын лектам. Вара кувандайлан шушаш арняште могай игече лийшашым рат дене ойленат пуэм. Тудыжат, мыйын семынемак аптыранен, «Айда, вара шагат йоткежат тыге игечым палаш лиеш, ужат…» - манеш. «Лиеш, - манам, - лиеш. У технологийлан кӧра пеш сай илыш толын». Тыге ынде кум тылзе годсек игечын могай лийшашыжым телефонышто эскерем.

Чатлама телат толын шуо. Игече чотак йӱкшемдыш. Окна вес могырышто кечыше градусникат ок кой - янда чылт кылмен шинчын. Уремыште мыняр градус йӱштым палаш адак саде телефонышкак пурем. Ончем - МЧС гыч увер толын: «6-шо ден 7-ше декабрьыште чатлама игече лийшаш. Йӱштӧ налын кертеш. Шкендам аралыза. Телефон: 112». Ик-кок кече гыч адак телефоныштем пик-пик шоктыш - смс-увер тольо, МЧС гычак. «9-ше ден 10-шо декабрьыште кундемна мучко 300 гыч 350 градус марте йӱштым сӧрат. Тӱткӧ лийза». Шинчамат, умшамат иканаште каралтыч… Тарваныде аптыранен шогымемым ужын, кувандай воктекем тольо. Тудо мыйым онча да телефоным, телефоным онча да мыйым. Тудлан мут деч посна парням дене гына смс-уверыште возымо цифр-влакым ончыктем. Тыгодым ужам: южын температуржым возымо цифр-влакын пытартыш нольышт шинча ончылнак йомыч да 30 гыч 35 градус марте йӱштӧ кодо. «Вот тиде теле!» - шоналтышым».