Сай арбузым кузе ойырыман?

Кевытыш мийымеке, эн ондак тӱжвал тӱсшым ончалман. Тудо пушкыдо, шелше лийшаш огыл - вашке шӱяш тӱҥалеш. Шокшо кечыште киен гын, тамже пужлышо лиеш. Налме деч ончыч шӱмжым изиш кӱзӧ дене удыралаш гын, ужар пуш лекшаш, ок лек гын, эше шуын огыл. 

Кажне арбузын шке тӱсшӧ. Тудын ужарге-нарынче тӱсшӧ ончен-куштымо, температур режим, вӱд шавыме деч шога. Арбуз пасушто кушкеш, садлан мландыште кийыме верже нарынче тӱсан лиеш. Тиде пале дене арбузын кӱмыжым палаш лиеш: тидыже кечын шокшыжым тӱрыснек налмым ончыкта.

Перыме годым могай йӱкым пуышаш? Йӱкшӧ чот йоҥга гын, шуын огыл, пич йӱкан гын, «мӧҥгешла» манмым ончыкта.

Арбуз «поч» шотышто кажне еҥын тӱрлӧ шонымаш. Утларакшым кукшо почан арбузым ойыраш темлат, но чылаж годым огыл. Арбузым вондыж деч ойырымеке, «почшо» ужарге лийшаш. Тудо вич-шым кече веле «ила», вара кошка, садлан кевытлаште утларакшым «почшо» кошкышо. Ужар почан арбузым ужыда гынат, тудым шоныде налза: свежа арбузым шукерте веле огыл кондымым ончыкта. А «почшо» шем тӱсан да лывыжгыше гын, арбуз сай огыл.

Арбузым кузе аралыман? Тудо ик верыште гына кия гын, кийыме верже гыч шӱяш тӱҥалеш. Садлан тудын йымак ошмам пыштыман але, пакетыш, сумкаш чыкен, пырдыжыш сакыман. Пӱчмӧ арбузым йӱштӧ верыште 12 шагат деч шуко кучыман огыл.