Оланам петуний сӧрастара

Тиде шинчам куандарыше моторлыкын лӱмжӧ - петуний. Йырысе вер-шӧрым ойыртемалтшын моторын сӧрастарен моштымыжлан кӧра тудо путырак кумдан шарлен: петунийым олаште аллейыште, бордюр пелен да моло верлаште шындат гын, яллаштат пакчазе-влак тудым садыштышт йӧратен куштат. А эше озавате-влак тиде кушкылым балконышто яшлыкыште, кеҥежымсе беседкыште, окна ончылан суртышто, пачерыште шындат. 

Петуний - оҥай пеледыш. Тудын шочмо элжылан Кечывалвел Америка шотлалтеш. Кушкылын лӱмжӧ «petun» француз шомак гыч шочын, тудо «табак» манын кусаралтеш. Чынжымак, пеледмыж годым петуний тамакын саскажым ушештара. Мемнан элыште тудым однолетник семын 18-ше курымышто шындаш тӱҥалыныт. Тулеч вара моткоч шуко сортым да гибридым лукмо: ал, ош, йошкар, йӱд канде, фиолетовый тӱсан, махровый да бахроман, молыжат. Кушкылын кокла кугытшо 15-70 сантиметрыш шуэш. Петуний кеҥеж гоч шинчам куандара, тудо кужаш - июнь гыч тӱҥалын, шыжым кылмыктыме марте - пеледеш. Койышыжат тыматле, чытышан. Клумбыш тӱрлӧ сортым пырля шындаш гын, тудо сӧрал коверым ушештара. Ончен куанет. Моторлыкынат шке вийже уло.