Чодыраш пураш чареныт

Тиде пожар лийын кертме лӱдыкшӧ дене кылдалтын. Тыгай йодмашым шуктымым посна патруль - МЧС, БР Чодыра озанлык министерствын, МВД-н, ГИБДД-н, муниципалитет-влакын пашаеҥышт - тергаш тӱҥалыт. Чодыралаште пожар ваштареш кучедалме режимым пудыртымылан граждан-влаклан 40 гыч 60 тӱжем теҥге марте административный штрафым пыштен, тыгак уголовный мут кучаш шогалтен кертыт. Юрлица-влаклан штрафын кугытшо 600 тӱжем теҥге гыч 2 миллион теҥге марте шуэш. «Кеҥежым пожар-влак пӱртӱсын койышыжлан, мутлан, волгенчылан кӧра лийыт гын, шошым нуно тӱҥ шотышто айдемын титакшылан кӧра талышнат», - палемден БР чодыра озанлык министр Марат Шарафутдинов. Тудын мутшо почеш, тений чрезвычайный ситуаций лийын кертме случайлан пожар-влакым йӧрташ 12 тӱжем еҥ да 3500 техника ямде. Май тӱҥалтыште тиде сомыллан республикылан ешартыш техникым ойырышаш улыт. 

Чодыраште пожар ылыжме нерген паледа гын, йӱдшӧ-кечыже пашам ыштыше +7(347)218-14-14  номер дене БР Чодыра озанлык министерствын диспетчер службышкыжо але 8-800-100-94-00 номер дене чодырам аралыме шотышто «вияш линийыш» йыҥгыртыман. 

Чодырасе пожар шотышто ситуаций уда могырыш вашталтеш гын, тушко пураш чарыме режимым эше жаплан шуят, увертара БР Чодыра озанлык министерствын пресс-службыжо.