Шошо тылзе - чевер ӱдыр гай

Чыла сомылжым мучашлымек веле, лывырге кап-кылже да сӧрал чурийвылышыж дене куандарен, келшыме рвезыж дек куржын колта. Волгыдо ончалтышыж дене йырым-йыр тӱням волгалтара, йырже шокшым, ныжылгылыкым, поро кумылым шара, ласка ончалтышыж дене кумылым кӱшкӧ, каваш шумеш, нӧлталеш. Тыгай чечен ӱдырым кузе от вучо?

Теве меат тудын гай кумылнам савырен кертше шошым пе-е-еш вучена. А тудо мемнан дек толаш ямдылалтынат шуктен огыл улмашыс. Куандарен шыргыжалме, кечыйолжо дене шыматыме олмеш юалге южшо дене сӱсандара, лум пырче-влакым пӧрдыктыл куштыкта да кокланже овартен-ораленат шындылеш. Ик жап «койышланен налмек» веле шерже темеш ала мо, мотор ӱдыр гай воштылал колта, мландым ырыкта, нӧргӧ кушкыллан вуйым нӧлталаш, пелед шогалаш ситышашлык шокшым шара. Тунамже йырым-йыр чылажат ылыж кая, у тӱс да у койыш дене куандара. Эй, шошо, вашкерак шокшетым кондо. Тыйын толметым вучена! Шошо кечылан чылан куанена!