Пӱртӱс мемнан чоннам эмла

Лиза ден пелашыже кок икшывым ончен куштат. Кугуракышт школыш, изирак ӱдырышт йочасадыш коштыт. Пелашыже ончычсо семынак Йӱдвелне пашам ышта, ик тылзе ешыж дене лиеш, вес тылзе - пашаште. Тудын вахтыш кайымыж годым чыла сомыл Лизан вачӱмбак возеш. Я школыш ача-ава погынымашыш, я йочасадыш мийыман. Шкежат, ешлан кеч изи шӱкалтыш лийже манын, пашам ышташ толаша. 

Уремыште теле озалана. Ик кечын изирак икшывыже йочасад гыч черланен тольо. Тиде ӱдырамашлан ойго дене иктак - шке шочшо верч кунам чонет ынже йӱлӧ? Ик арня мӧҥгыштӧ шинчымек, кугуракшынат температуржо кӱзыш. Нунылан верч шуко йӱд омыжым коштыш. Вара шкежат черланыш. Суртоза пашаш кайыме годым кеч-кунамат йӧсӧ чучеш. Но Лиза шкенжым кидыш нале, йоча-влаклан чон йӧсыжым ыш ончыкто. Нунын дене модо, уремыш яндар южыш кондыштарыш - икманаш, ӧкымешак шке ава пашажым шуктен шогыш.

Ик кечын Лиза чон йӧсыж дене аважлан йыҥгыртыш, «Авай, вучо, таче ме тый декет унала миена» мане. Йӧра, кеч машина дене шкеак кудалыштеш. Олаште тиддеч посна огешат лий: ик икшывым школыш наҥгайыман, весыжым -  йочасадыш, школ деч вара тӱрлӧ кружокыш кондыштарыман. 

Тыгай пагытыште кече утыр кӱчыкемеш, садлан ялыш миен шумешкышт, касат лие. Аваже нуным вашлияш сийым ямдылен, мончаш олтен. 

Шке суртышто чон кеч-кунамат кана, а ава пелен пуйто куанен чӱчка. Тиде ганат Лиза ден аваже йӱд мартеак мутланен шинчышт. Ӱдыржӧ аважлан чыла чон йӧсыжым почын пуыш. А эрдене, изиш ола илыш деч кораҥаш манын, чодыраш яндар юж дене шӱлалташ ошкыльо. 

Пӱртӱс - мемнан эн шерге поянлыкна. Тудо эре шкеж дек ӱжеш, мыланна нимом ок чамане. Пӱртӱс лоҥгаште сай - тушто чоннам кандарена. Кайык-влакын шыр-р-р чоҥештен лекмыштым, укш тодылалт волен вочмым, моло йӱк-йӱаным колышт коштын, Лиза жап эртымымат ыш шиж. Чонжылан ласка лие. Тудо шукертсек пала: пӱртӱс шӱм-чоным лыпландара, эмла, илаш вийым пуа. Арамлан огыл марий калык ожсек пӱртӱс деч илыш ыҥгайлыкым, аралтышым йодын кумалеш... 

Но, шочмо-кушмо суртышто кеч-мыняр сай гынат, мӧҥгӧ кайыман. Тиде ганат Лизан аваж дек толын коштмыжо арам ыш лий - вачӱмбачше чыла нелылыкым кудалтен кодыш, кумыл нӧлталтмым шиже, изи чукайже-влаклан ончыкыжат ӱшанле эҥертыш лияш вий ешаралтмым умылыш.