Чыла куштырам лум леведеш

Кеҥежымсе пӱртӱс шуко мотор кушкыл да тӱрлӧ сӧрал пеледыш дене шинчам куандара. Тыгодым корно воктен да ӧрдыжтырак ятыр куштыра коеш. Тыште коштшо-влак вӱдым але сокым подылыныт, пӱкшым пурыштыныт ма, атыжым корнешак кышкен коденыт. Чодыра кӧргышкырак пураш гын, эше начаррак сӱрет почылтеш. 

Лум вочмо деч лач ик кече ончыч «Краса Увал» сад-пакча-влак велыш корно дене кайышнат, кугурак гына шӱкшак ора дек миен лекна. Ӧрат, молан кӱлдымашыш лекше тӱрлӧ арверым пӱртӱс лоҥгаш намиен кышкеныт? Олаште шӱкым погымо верыш кудалташ огеш лий ыле мо? Але пакча гыч толмышт годым автомашинаштым «куштылемденыт»? А ик-кок гана тӱрлӧ вере эсогыл пушеҥге коклаште почаҥылше мебельымат ужаш логалын. Тидыже экологийлан изи огыл эҥгекым ыштас, а туддене кажнынан тазалыкше кылдалтын… 

Тиде кечылаште игече йӱкшемдыш, да лум пырче-влак, южышто пӧрдын-модын, шем мландым петырен шындышт. Теле кугызан мландым ош ужгаж дене кӱжгынрак леведмыжым вучен шуктена гын, чодырасе чыла куштыра да тор лум йымалан кодыт ыле. Тунам йолыш ечым чиена да, йырым-йырысе мотор пӱртӱсым ончыштын, ик-кок шагат коклаште чодырасе мӱндыр луклаш да кӱртньыгорно воктен шуйнышо ечыгорно дене телым кылмыдыме эҥер воктекат миен шуына. Оҥ тич яндар южым, кож да пӱнчӧ лӱс пушым шӱлен, марий манмыла, шодым «овартен», мӧҥгӧ йывыртен пӧртылына.