Шыже пайрем

Куэ-шамыч шкеныштын йытыра улмыштым пеш палат, тугат, эше чаплырак лияш манын, изижге-кугужге ший окам сакалтышт, шӧртньӧ кидшолым чиен шогальыч да ош тувырыштым утларак волгалтарышт. Ӱмбачышт шинчамат налмет ок шу, куанен ончен, шерет ок тем. Тыматлырак, изиш вожылалше шопке-влакат Шыжын пайремжылан ямдылалтыт. Ужаргырак тувырыштым тул гай йошкар йыргешке шер дене сӧрастарышт, тӱзатышт. Воктечышт изирак мардеж эрта гынат, мотор лышташ-влак чыл-йыл тарванат, шыве-шыве шомакым луктыт, шке векышт шинчам савырат. Кож ден Пӱнчӧ кычалтылше огытыл, но ӱжмӧ верыш толынат гын, тор лийшаш отыл. Садлан нунат чапле ужар сывыныштым тӱзатеныт, йӱр вӱд дене шӱалтен уэмденыт. Кечыйол йымалне кажне тӱржӧ, кажне имыже йылгыжеш, ужар тӱсышт келгемын, вияҥын, ковыра Куэ ден Шопке  коклаште мӱндыркӧ-мӱндыркӧ коеш. Пызле, Локама, Поланвондо, тӱрлӧ Шудо да пытартыш Вис-вис-шамычат ӧрдыжеш ышт код, чыланат Куван кеҥеж дене вашлияш ямдылалтыч. А могай гына тӱсым конден огытыл! Шомакат ок сите, шке ужаш кӱлеш - шинча дене, шӱм-чон дене. Ой, Шыже, поян вате, кертеш ве-е-ет, кертеш куандарен, тӱзатен, семален, чапле куан шижмашым шӱмышкӧ пуртен. А мыняре сийже - разга пызлыгичке, кӱжгӧ тӱрван чоя курезе, ӱян пӱкш, шере олма... Нал, пого, нимынярат ок чамане, шке вел ит ӧркане. Ямле пагыт - куван кеҥеж.

Жап писын эрта, Куван кеҥежат ок юватыл, писын гына икте-весе дене пелешткален, вашлиймашлан куанен, шке сомылжо дене умбаке ошкылеш. Да, вашке гыч вес уна - Ночко шыже - толеш, тудымат шот денак вашлийман.