Макси лӱман тыра

Эҥер серыште шинчыме годым канде, ужар тӱсан вӱдшырчык-влакын чоҥештылмыштым эскеренна. Нунын марла лӱмыштым колын огынал, очыни, сандене рушла ойленна. Кызыт онлайн-переводчик тыгай синоним-влакым темла: «имывор, вӱдшырчык, ӱшвуй, пелтевуй». 

Олыкышто  кужу шудо коклаште коштмо годым лӱддымырак йоча шудышырчыкым кучаш тыршен. Иктаж-кӧн шыгыльыже лийын гын, тудлан пурлыктен. Шудышырчыкын аярже шыгыльым пытара.  Тудым мемнан велне эше мӧртага маныт. 

Кечан шокшо годым йырым-йырна тӱжем дене мӱкш, пачемыш, ошымшӱлыш, карме, шыҥа чоҥештен эртат. Шошым кече виянрак ырыкташ тӱҥалеш веле - лыве-влак чоҥештен лектыт. Ош, канде да йӱд-нарынче-шемалге шулдыран лепене-влак телым вӱташте, пырня шелшыште, окна рама коклаште «малат».  Кечын шокшыж дене нуно угыч «иланат» да пеледыш лоҥгашке вашкат. Ме нуным руш семын «белянка», «голубянка», «крапивница», «лимонница», «павлиний глаз» ышталына. Иктаж-кӧ нунын марла лӱмыштым пала мо?