Ныжыл пеледыш-влак

Кодшийсе вӱдыжгырак лышташ тӧшак ӱмбалне ал-сирень пеледышан чечкевондо але эчкевондо (медуница) эрвелмарий ватын тӱржӧ гай койылда. Тыштак изи нарынче шӱдыр гай кишкыйылме пеледыш (гусиный лук) шошо кавашке ончалеш. Чара верыште, курык тайылыште име гай вичкыж лышташан, нугыдо-нарынче пеледышан тулпеледыш (горицвет, адонис) кечыла шинчам йымыктара. Волгыдо-нарынче пеледышан эмлык тылзылӱҥгым (примула лекарственная, первоцвет весенний) ме комбычапа манына ыле. Шере таман кушкылым изина годым кочкашат йӧратенна. Тудын оҥгыр орлай гай ныжыл пеледышыже-влак вичкыж волгыдо-ужар вурго-пучышто лӱҥгалтат. 

Тиде пеледыш-влакым ме шукыж годым руш еҥ семын «подснежник», «первоцвет» ышталына. Марий йылмыштат нунын лӱмышт могай сылнын йоҥга улмаш! Шошым эн ончыч вашлийше пеледыш-влакым Йошкар Книгашке пуртеныт. Нуным кӱраш, тошкаш ок йӧрӧ. Лумйымал пеледыш-влакын ӱмырышт моткоч кӱчык. Тиде жапыште нуно шочшаш, кугемшаш, вийым погышаш, шушаш да нӧшмым шарышаш улыт. Чыла пеледышат нӧшмым шарен огеш керт. Тидлан южгунам вӱдыжгӧ, шокшо, волгыдо огыт сите. А у кушкылын пеледмешкыже, кок-кум, южгунам вич ият эрта.