Шочмо вел садак эн мотор

Кеч-кушко, теҥыз воктек але курыкан велыш курортыш, миет гынат, шочмо вел садак эн лишыл да мотор чучеш. Мемнан кундемна - Дӧртыльӧ, Илиш, Чекмагуш районла - ончычракат шкеныштын тӱзыклыкышт, моторлыкышт дене ойыртемалтыт ыле, кызытат тыгак каласаш лиеш.

Эсогыл ондак таксист-влак анекдот семын тыге ойленыт. Пуйто республикын ончычсо вуйлатышыже шкенжын шочмо-кушмо велысе аксакал-влакым погенат, ойлен: «Пагалымем-влак, мый шуко вере коштам, республикынан чыла районлаштыже лийынам. Шочмо-кушмо районем тӱз да мотор лийже манын, шуко тыршем, шонем. Моло районлан ойырымо бюджет окса гыч тыланда ешарем, нунылан шагалрак кодем, но окса кушко дыр кучылталтеш, а ончык кайыме ок шижалт. Молан? Мом эше ышташ кӱлеш? А тиде кум район, кузе моторештын, тӱзланен, тугак ончыко кая. Молан? Амалже кушто?»

Чынак, ойлат, мемнан велне иктаж еҥ мотор печым шогалтен гын, тидым ужын, йыгыре але мӱндыррак пошкудыжо, у вургемым налын чийыде, кампет-печеньым кочде, ик-кок ий чытен, но туддеч сайрак, моторрак печым але капкам ыштен. Чын але уке, каласен ом керт. «Чын» манам гын, «Моктана» маныда. Но ик путешественник, нине районла да пӱтынь Россий мучко эртымек, каласен, маныт: «Башкортостаныште да Татарстаныште эн сайын илат. Поянлык шотышто каласен ом керт, но кеч-момат ондак тӱжвал сыным ончен аклат: пӧрт ден пӧртвуй, пече-влак тусо районлаште, чынак, эн мотор улыт. Корно тӱрлаште, ял уремлаште куштырам от уж, шӱкшудо озаланен ок куш. Солалтын, погалтын. Тугеже, калык арулыкым йӧрата. Районышто, яллаште шотан оза уло. Калыкым моштен вуйлатат, да калыкшат шотан, пашам йӧратыше улеш».

Пытартыш жапыште чыла вере сӱрет икгайрак. Но мом маныда гынат, шке шочмо вел моторрак.

Ф. БАЙТУКОВ.