Кеҥежым лум дене вашлийна

Игечылан мемнам ӧрыктарылаш келшыш аман: теве гына мотор кече дене чоннам вӱчка гын, эрлашыжлан юалге юж дене кап-кылнам сӱсандарен ӧндалеш. Игече нерген шижтарыше интернетысе сайтлам эскерен, уремыш юж температурлан келшышынак чиен лекташ тӧчена, да садак чылажым шотыш налын шукташ огеш лий.

Шарнем, 1981 ийыште 18 майыште ужар сывын дене ковыраланыше мландым лу сантиметр кӱжгытанрак лум ужга леведе. А тений 1 июнь кечын Нефтекамск олаште эр гычак южышто лум пырче-влак йыр пӧрдын «кушталтышт». Юж температур 3 градус веле ыле. Дӧртыльӧ, Салават, Ишимбай, Стерлитамак, Октябрьский олалаште илыше-влакат социальный сетьлаш лум велме сӱретым вераҥденыт. Тыге тений икымше кеҥеж кечым лум дене вашлийна.

Э. АЛЕКСЕЕВА.