Поро паша тӱрлӧ лийын кертеш: кӧ икшывыже-влаклан ий катокым ышта, кӧ, пеледышым шынден, вер-шӧржым сӧрастара, кӧ памашым кӱнча.
Ялыште кеч-могай сӧрал пӧрт-влак огыт лий гынат, уремыште асфальт уке гын, тыгай сӱрет чыла моторлыкым авыра.
Бирск районысо Кужнур сельсоветыш пурышо Бажан селаште да Кужнур ялыште илыше-влак, погынен, шке вийышт дене корнышто улшо лаке-влакым ачалат.
Яллаште южо вере асфальт уке але огыт олмыкто гын, тошто зданийым сӱмырен, тудын деч кодшо кермычым, кӱ-влакым конден, ялче-влак корным шке олмыктат. Лӱмын асфальтым пыштыше кугу машина, техникат огыт кӱл - кольмым, товарым да кӱлешан ӱзгарым нал да ыште. Тидын шотышто Кужнур калык мӧҥгыштыжӧ ойгырен ок шинче. «Эн тӱҥжӧ - материал лийже, корно тӧрлаталтше, ышташыже огына ӧркане», - ойлат нуно.