Поро паша шӱдӧ ий ила

Кодший кеҥежым клуб оралте йыр печым печаш субботникыш погынышо пӧръеҥ-влак Ветеран-влакын аллейыштым ышташ кутырен келшеныт улмаш. Бакале лесничестве гыч канде кож-влакым налаш йӧн лектат, еҥ-влак вашке гына погынышт да клуб воктен пушеҥге-влакым шынденат нальыч. Тыштак афган сарын ветеранже Р.М. Ахметшин Кугу Ачамланде сарыште вуйыштым пыштыше-влаклан почмо обелиск вашеш локальный сарлаште лийше-влаклан стелым ышташ темлен. Тидлан район администрацийыште разрешенийым налын. Инициативный тӱшка калык деч оксам погыш. Ялче-влак да пошкудо яллаште, ӧрдыж кундемлаште илыше-влакат окса дене чот полшышт.

Тений, лум шулымек, ял калык тиде пашалан пиже. Сиреньым куклен, мландым тӧрлышт, негызым пыштен, кермыч дене стелым ыштен шогалтышт. Бордюрым келыштарышт, асфальтым пыштышт. 

Тиде жапыштак моло пашамат ворандарен шогышт. Валерий Мавлеев шке материалже-влак дене стела дек пурымо корнышто кугу шӱдырым, Андрей Батыров шке кумылын кеҥеж сценым ыштен шындышт. Андрейлан Валентин Гайнанов, Максим Юсаев полышкалышт. Борис Ахтямов шке материалже дене изигапкам ыштыш.

Элын тӱҥ пайремже - Российын кечыж деч ончыч стелым почмаш лие. Тушко шуко уна да ялче-влак погынышт. Афган сарын ветеранже-влак Р.М. Ахметшин да В.Ш. Алтынбаев, кумыл нӧлтын, йошкар лентым пӱчкыч. Сӧй пасу гыч пӧртылдымӧ салтак-шамычым шып шоген шарналтышт. Умбакыже ял пайрем кеҥеж сцена воктен шуйныш.

Шукерте огыл ял калык эше ик суапле пашам ыштен нале - вате-марий Елена Искандаровна ден Владимир Асылкаевич Шангареевмытын ойышт да вуйлатымышт дене пакча шеҥгелне йыргыктен лекше памаш шинчам эрыктышт. Тошто бетон оҥгым вашталтышт. Кӱвареш у оҥа-влакым вакшыч, левашым ыштен шогалтышт. Памаш воктек пеледышым шындышт да покрышка гыч ыштыме фигур-влак дене сӧрастарышт.

Ме тыгай пашаш ушнышо кажне еҥлан кугу деч кугу таум ойлена, ончыкыжат ура чонан лияш тыланена.