Школысо музейыште

Ты гана нуно вожатый-влак дене пырля Чорай селасе марий гимназийыште верланыше тоштерыш миеныт. «Эр кочкышым ыштен, кумло индеш йоча да вич вожатый пошкудо ялыш йолын каяш тарванышна. Корно мучко йоча-влак мурым мурышт, мыскарам, илышыштышт лийше историйым каласкалышт. Оҥай кайыкым але шукш-копшаҥгым ужыныт гын, чылан ончаш тӧченыт. Нылле минут ныл минут гай веле эртен кайыш», - ойла вожатый О.С. Шамыков. 

Экскурсийым Е.М. Николкин эртарен. Йоча-влак ожсо курымышто илыше еҥ-влакын илыш-йӱлашт нерген ятыр уым пален налыныт - икымше гана тошто окса-влакым, ожсо марий калык вургемым да молымат ужыныт. Евгений Михайлович нунылан ожно еҥ-влакын тул, газ деч посна кузе илымышт, вургемым волеш мушмышт, кочкышым ямдылымышт, озанлыкыште пашалан могай ӱзгар-влакым кучылтмо нерген каласкален.

«Экскурсий йоча-влаклан гына огыл, мыланнат, вожатый-влаклан, пеш келшыш. Корно мучко ужмым-колмым лончылен толна. Икманаш, ожсо жапыш логалме гаяк чучо», - каласыш Олег Сергеевич.