Республикыште таче. ПОШКЫРТ УРЛЫК ИМНЕ

Тӱҥ призше - автомобиль!

11 августышто имне дене таҥасымашын ойырен налме туржым эртарат. Тӱҥ пайремже 12 августышто, шуматкечын, лиеш. Тушко мийыше-влак ятыр оҥай мероприятийым ончен да, кумылышт уло гын, шкештат ушнен кертыт. Тиде:

• Имне дене таҥасымаш. Тӱҥ призше - автомобиль.
• Калык таҥасымаш-влак: «Аузарыш» (имне ӱмбалне шинчен кучедалмаш), «Ылак» (имнешке-влак ваштареш модшо командын казанышкыже «голым» пурташ тыршат, призше - миллион теҥге), «Тай-тулак» (имньым кошташ туныктышо-влакын чемпионатышт), шоген да имне ӱмбач пикш дене лӱйкалымаш.
• Тӱрлӧ урлык имне-влакын выставкышт.
• Кумысфест. Республикыште тиде пайдале йӱышым ямдылыше-влак кокла гыч эн сайжым ойырен налыт, а ончаш мийыше-влак мемнан кундемыште ыштыме тутло кумысым тамлен кертыт.
• Шанче программа - «Урлык имньым ӧрчыктарыме да имне озанлыкын продукцийжым перерабатыватлыме проблема-влак» темылан Всероссийский шанче-практик конференций. Спикерже-влак коклаште Дагестан, Казахстан, Таджикистан, Азербайджан да Крым, Киргиз, Чечен республикыла гыч толшо-влак лийыт.

11 да 12 август кастене Башкортостанын калык артистше-влак Фидан Гафаров, Артур Каипкулов, Вильдан Яруллин, Расуль Карабулатов, «Каравансарай» группа, «Башстайл» да моло ӱжмӧ уна-влак мастарлыкыштым ончыктат. 

Фестиваль жапыште тӱрлӧ сатум, кочкыш-йӱышым ужалат, автомашинам тугок шогалташ посна вер лиеш.

Имне дене таҥасымашке кузе ушнаш?

Имне дене таҥасымашке да моло спорт модмашке ушнаш шонышо-влак фестивальын www.bashkort-aty.ru сайтыштыже регистрацийым эртышаш улыт. 

Фестиваль шотышто кеч-могай йодышым Республикысе ситуационный рӱдерыште рашемдаш лиеш. Телефон номерже - 122, вара 4 цифрым ешарен темдалман.

Икшыве-влакым мо дене куандарат?

Икшыве-влаклан интерактивный, калык модыш ден спорт таҥасымаш-влакым ямдыленыт. Тиде «Сукмарыргытыу» (булавам кышкымаш),  «Ташкутареу» (кӱм нӧлтымаш), «Тартыш» (кандырам шупшмаш), «Таяктартыу» (мас-рестлинг), корэш кучедалмаш, «Кумыс миля» куржмаш, «Тарт-эт» (шупш-шӱкӧ). Башкир кугыжаныш курчак театр спектакльым ончыкта. 

Кузе миен шуман?

Уфа гыч Графское ер марте 410 километр лиеш. Шке машина дене Баймак марте, тушеч ер марте кум километрым корнышто указатель-влакым эскерен кайыман. Общественный транспорт дене мийыше-влаклан Баймак гыч фестиваль алан марте маршрут автобус кошташ тӱҥалеш. 

Пошкырт урлык имне мо дене ойыртемалтеш?

Ӱлыш тӧпката пошкырт урлык имне-влак моторлык дене огыт ойыртемалт гынат, виян да чытышан улыт. Ожно нуным ял озанлыкыште, транспорт семын, кӱлеш годым сар жапыштат кучылтыныт. 

Ятыр шӱдӧ ий дене тывел кундемыште илымылан кӧра имне-влак тысе игечылан  тунем шуыныт. Айдемын ты урлыкым саемдаш толашыдымыжым, естественный отборлан ӱшанымыжым сайлан гына шотлыман, очыни. Тыге имне-влак идалык мучко эрыкыште кочкын коштыныт да кызытат, мӧҥгысӧ вольыклан шотлалтыт гынат, телымат, кӱчышт дене лумым пургедын, шкаланышт шке кочкышым кычал муын кертыт.