Поро пашам ыштыме жап. Пашаче калыкын пайремжат ямле

Конешне, тыштат, шке вийыштлан да чолга еҥ-влаклан эҥертен, тӱшкан каҥашен ямдылалтыныт, тыгай культмассовый пашам тарваташ Арсений Андреевлан ӱшаненыт. Ялыштым тӱзатыме сомылыштым, кӱвар-влакым чоҥымыштым, Шарнымаш аллейлан негызым пыштымыштым «Чолман» газет гоч  кумдан ончыктен шогышна. Тыге чумырген, ик шӱлыш дене пижын, кугу подрядный организаций ыштышаш пашам шке кӱшеш шуктен кертше чолга еҥ-влакым могай вий тарватен кертмым шке шинчам дене ужмемым газетын ту жапыште лекше номерлаштыже возенам. Но… йӱксавышыже тидын дене пытен огыл. Кульчубайысе чолга марий-влакын тарватыме мер пашашт мемнан республика Вуйлык Радий Хабировын «Поро пашам ыштыме жап» грантшын проектшыланат келшен толын. «Памаш-влакым почыт, тӧрлат, уэмдат, шке ялыштышт моло поро сомылым шуктышо чолга еҥ-влакым ятыр вере вашлияш лиеш. А улыт мо, верысе чолга тӱшкалан эҥертен, мер проект семын шочмо ялыштым тӱзатыме кугу пашам тарватыше-влак?» - йодыныт ыле мый дечем «Башинформ» ИА-н пашаеҥже-влак. Нунылан «Ярҙам - время добрых дел» проект почеш ямдылаш оҥай материал кӱлын. Ойлыманат огыл, кульчубай-влакын пашашт нуным куандарен да ӧрыктарен. А ял пайрем кечын мыланем калык верч тыршыше, поро пашам ышташ молымат таратен шогышо чолга еҥ-влаклан «Башинформын» дипломжым, медаль ден шарнымаш знак-влакым кучыкташ ӱшанышт. 

Тудым ял староста Константин Шамиев, Евгений ден Сергей Микаевмыт да молат суленыт. Икманаш, тений кульчубай-влакын пайремышт шке ялышт да лӱмлӧ, талешке ялчышт-влак дене кугешныме, нуным порын шарныме кече семын эртыш. Уна-влакымат порын вашлийыныт: эн сай мурызо, кидпаша мастар да сылнымутчо-влакым пӧлек дене палемденыт. Кумылзак да пашаче калыкын пайремжым поснак мо сӧрастара, шонеда? Ожнысек пале: могай унан «имне шӧрмычшӧ пайремым тарватыше озан капка меҥгешыже кылдалтын», пайремат тугайрак шӱлышан лиеш.

Меат «Чолман» редакций гыч тыгай кумылым шуктымо шонымаш дене мийышна. «Шӱдыргорно» ансамбль дене пырля, пиалешна да Кульчубай пайрем калыкын куанжылан, шукертсе поро йолташна, мурызо пограничник Борислав Ашиев уло кумылын пайремым сӧрастараш келшыш. «Чолман» газетын Нефтекамск олаште эртарыме Регион-влак кокласе фестивальыштыже тудо ик гана веле огыл шке мастарлыкшым ончыктен. Ты гана Кульчубай кундемысе калыкланат Мишкан районысо Курык Вуй (Изи Накаряк) ялеш шочын-кушшо землякышт дене палыме лияш йӧн лие. Пеш шокшын вашлийыч. Манаш веле! Вет тиде рвезе - ончыч Чукоткышто, кызыт Краснодар кундемыште служитлыше пограничный войскан майоржо - икмыняр ий ончыч Пограничный мурын тӱнямбал конкурсыштыжо сеҥыше лийын! Но сюрприз тидын дене пытен огыл. Ты жапыштак Бориславын шӱжаржат ялыш отпусклан толын. Алена Ашиеват Пограничный институтым тунем пытарен, курсант улмыж годым тудат муро конкурслаште мастарлыкшым ончыктен (Марла мурен!). Кульчубайыштат чон почын калыкым куандарыш.

Пашаче, тыршыше калык… Пашам сайын ыштыше каненат мошта. Ожнысек кеҥеж ноен-пӱжалт пашам ыштыме тургымлан шотлалтын. «Кеҥежын ик кечыже телым пукша» манме калыкмут яра гыч шочын огыл. Ынде илыш вашталтын, калык кеҥежым пайремлашат жапым муэш. Тыршышан калыкын пайремжат оҥайын эрта. Ойыртемалтше, уна да ончаш толшо-влакым куандарыше, кажне гана иктымак ушештарыше официальный мероприятий гай огыл.  Молан манаш гын, чолга организатор-влакын вӱдымышт почеш шке вийыштлан эҥертен, мер калыкын  кумылжылан келшыше шӱлыш дене ямдыленыт. Кульчубайыште пайрем лач тыгай ыле.