Ӱткӱстӧ ял уэмеш

Ялна  мотор  тӱсым  нале.  Ялысе активист-влак шӱгарлам эрыкташ таратышт. Ик чевер кечын кок ялыште илыше-влак шӱгарлам шотыш кондышт, а вес кечынже обелиск йырысе верым йытырайышт.  Ынде ялнам ончен кӧранет. Ончыч, икмыняр гана клубеш погынен, корным олмыкташ пунчалым луктыныт ыле. Ты сомыл уремысе вӱдан кугу лаке-влакым пытараш полшыш, машинан еҥ-влак  куанен коштыт. Кодшо ий  медпунктым уэмдышт. Тыге ялна эркын-эркын уэмеш.  Кажне суртышто газ уло, вӱдымат пӧртыш пуртымо, кудысо паша-влак куштылемыч. Вольыкым ынде черет дене пастыркален огына кӱтӧ, электрокӱтӱчӧ эскера.  Уткӱстӧ да Иткули яллаште пенсионер-влак ятыр улыт, нунын илышышт куштылеме.

Ялысе калык шкенжын староста да депутатше-влак дене келшен ила гын, шуко паша куштылгын ышталтеш. Май тӱҥалтысе паша пайрем кече-влак  мемнан дене эртышт.