Акпарс нерген книгам луктыныт

Книга презентаций-влак утларакшым библиотекыште, клубышто, книга кевытыште эртаралтыт. Мемнан дене тыгай йӧн уке, садлан «История д. Акбарисово» книган презентацийжым 19 апрельыште Акпарс школышто эртарышна. Тыште унам вашлияш эре ямде улыт. Туныктышо ден тунемше-влак тиде ганат пайремлан сайын ямдылалтыныт, сценым келыштарен сӧрастареныт, выставкым чумыреныт. Л.М. Шамыкаева сценарийым возен да мероприятийым устан вӱден.

Н.М. Давлетова шукертсек шочмо ялже нерген книгам лукташ шонен коштын. Районышто кумдан палыме журналист, краевед, куд книган авторжо Р.Х. Мусинлан Акпарс нергенат возаш темлен. Раиль Хатипович тореш лийын огыл, пашалан кыртмен пижын. Кок ий жапыште тӱрлӧ архивлаште улшо шуко материалым шымлен, документ ден фотографий-влакым, ялын историйже да калыкше нерген поян материалым чумырен, шуко еҥ дене вашлийын. Тидлан Уфа, Туймаза, Набережный Челна, Казань олалаш кудалышташ верештын. Книгашке «Акбарисовский» совхоз нерген икымше директоржо Д.Д. Шуматбаевын, паша ветеран-влакын шарнымашыштым пуртен. Чыла тидыже - 400 лаштыкан книгаште.

Презентацийыште ты ялыште шочын-кушшо, пӱрымашыштым тудын дене кылдыше, тыгак пошкудо ялла гыч толшо еҥ-шамыч лийыныт. 

Туныктышо-влак, «Ош пеледыш» ансамбльын участницыже-влак шочмо ял нерген муро-влакым йоҥгалтарышт, тунемше-влак почеламутым сылнын каласкалышт, шинчавӱд лекмеш, чоным тарватен кертыч. 

Тау туныктышо-влаклан! У книга дене саламлаш толшо-влакат  ятыр ыльыч: Акпарс сельский поселенийын вуйлыкшо Р.Г. Ягудин, Шаран села гыч Д.Д. Шуматбаевын ватыже Вера Байдимировна, В.М. Кунаккузин, паша ветеран-влак Р.Д. Ахметшина, Д.М. Сабанаев, Т.М. Атнакаева да молат. БСТ гыч толшо  корреспондент А.В. Андреева презентаций материалым уло кумылын возен, школыш толын кертдыме Габдуллина Соня да Кунаккузина Алма кокай-влак дек шкеак миен, интервьюм налын, а Н.М. Давлетова нуныланат книгам пӧлеклен.

Презентаций молан да кӧлан кӱлеш? Книгам ужален, оксам ыштен налын, кӱсеным овартыме нерген умшамат почман огыл. Надежда Мурзагареевна пайремыш толшо-влаклан шуко книгам пӧлеклыш. Презентаций эн ондак авторлан кӱлеш, шонем. У книга дене палдарымаш - тиде эн тӱҥ. Книган авторжо Р.Х. Мусин ончыкылык пашаж дене палдарыш, книгам лукташ полшышо-влаклан калык ончылно кугу таум ойлыш. Кызыт Набережный Челна олаште илыше М.К. Кибатовлан шуко пайдале материалым книгаш пурташ разрешенийым пуымыжлан посна таум каласыш. Школ директор Г.Ф. Габдрахманова книга нерген кугешнен ойлыш да Н.М. Давлетова ден Р.Х. Мусинлан пӧлекым, Р.Г. Ягудин таумутан серышым кучыктышт. А тунемше-влакын презентацийлан куанымышт тӱткын колышт шинчымышт гычак пале лийын. Р.Х. Мусинат куанжым шылтен огыл, шулдыраҥмыла чучын - творческий еҥлан тиде моткоч кӱлешан. Адакшым презентаций годым йоҥгалтше тынар моктеммутым серыше еҥ кунам да кушто колеш?

Илыш тыгай. Тудо мемнан деч пӧртылде кая. Шарнымашыште веле кодеш. Шарнымашыште да эше архивлаште… Эртышым шарналташ мыланна архивласе материал-влак полшен кертыт. Ятыр событий историеш кодын, садлан самырык-влакым родо-тукымыштын илыш-корнышт, тукым кылышт дене палдарыме ик сай йӧнлан книгам шотлаш лиеш. Кызытсе жапыште кугезе тукым ден мемнан кокласе кылым арален, мемнан йочана-влаклан шке тукымышт нерген каласкален кодымашым моткоч кӱлешанлан шотлыман.

Надежда Мурзагареевна ден Раиль Хатипович пеш кугу суапле пашам тӱҥалыныт. Тек тиде поро тӱҥалтышын ӱмыржӧ кужу лиеш, ончыкыжым Акпарс ял нерген у том-влак шочыт. Мый ӱшанем, тиде изданийым мемнан икшывына ден уныкана-влакат лудаш тӱҥалыт, книга лаштыклаште шкеныштын кочашт ден куваваштым, палыме фамилий-влакым кычалыт. Кушкын шумекышт, ала шкеныштын шочмо ялышт нерген книгам возаш кумылышт шочеш?