Тазалык шӧртньӧ дечат шерге

Александра Баязитова Нефтекамск олаште шочын. Тыште икымше классым тунем пытарымек, ешыже Мишкан район У Тымбай ялыш илаш куснен. Тыге оласе ӱдыр ялыш логалын. Но чон садак шке олашкыжак ӱжын. Тымбай ялыште 9 классым тунем лекмеке, Нефтекамск оласе 138-ше училищыш поварлан тунемаш каен да йошкар диплом дене пытарен. Вара шке шинчымашыжым умбакыже шуараш шонен пыштен: Бирск оласе медико-фармацевтический колледжыште ныл ий фельдшерлан тунемын. Нылымше курсышто пошкудо Измар ял рвезылан марлан лектын. Колледжым йошкар диплом дене тунем пытарен, 2014 ийыште Измар ялыш пашаш толын,  а 2018 ий гыч «Земский фельдшер» программе дене пашам ышта. «Мыйын пашаш толмо годым 500 тӱжем теҥгем пуат ыле. Жап писын эрта, тиде программе дене пел ий гына ыштышашем кодын. 2020 ийыште у ФАП-ым почыч, молан ышташ огыл? - ойла Александра. - Шке ял калык верч садак чон йӱла, ынышт черлане, таза лийышт манын шонет. Кызытсе илышыште могай гына чер уке. Шке тазалыкым перегыман, эскерен шогыман. Поснак шошым да шыжым тӱрлӧ витамин полшымо дене организмым пеҥгыдемдыман. Адакшым ял лишнак тазалыклан пайдале кушкыл-влак кушкыт. Нунын дене пайдаланыме тӱрлӧ рецептым ончалаш лиеш. Айдеме шкенжым йӧрата гын, ала-кузеат шке тазалыкшым перегаш тӱҥалеш».  

Александра ден Сергей пелашыже Станислав эргыштым ончен куштат. «Ялысе фельдшерлан ыштыме жапыште могай эскерымашет утларак палдырна?» манын йодмемлан теве тыге вашештыш: «Ял калык шке тазалыкшылан жапым ойыраш огеш йӧрате. Иктаж-мо коршта гынат, эмлымверыш огыт кай, чытен коштыт. Але пашам кодымышт ок шу. Садлан пашалан гына огыл, шке тазалыкыштланат жапым ойырат гын, черланышат шагал лиеш ыле».

Тыге шол, ала-молан ялысе калык шке тазалыкшылан тӱткылыкым ойыраш, диспансеризацийым эрташ ӧркана. Шкенам шке огына ончо гын, кӧ мемнан верч тургыжланаш тӱҥалеш?